പരാതിയിൽ നടപടി എടുക്കുന്നില്ലെന്ന്​ ജില്ല പഞ്ചായത്ത്​ മുൻ അംഗം

തൃശൂർ: തനിക്ക് നേരിട്ട അധിക്ഷേപം സംബന്ധിച്ച് സംസ്ഥാന പൊലീസ് മേധാവിക്കും മനുഷ്യാവകാശ കമീഷനും കോൺഗ്രസ് നേതൃത്വത്തിനും നൽകിയ പരാതിയിൽ നടപടിയില്ലെന്ന് ജില്ല പഞ്ചായത്ത് മുൻ അംഗം ഷീല പത്മനാഭൻ വാർത്തസമ്മേളനത്തിൽ പറഞ്ഞു. രോഗപീഡയും മറ്റുമായി കിടപ്പുരോഗിയായപ്പോൾ ജില്ല കോൺഗ്രസ് നേതൃത്വത്തോട് സഹായത്തിന് അപേക്ഷിച്ചിരുന്നു. ഇക്കാര്യത്തിൽ തീരുമാനമെടുക്കാൻ ചേർന്ന യോഗത്തിൽ ഡി.സി.സി സെക്രട്ടറിയും വടക്കാഞ്ചേരി നഗരസഭ കൗൺസിലറുമായ കെ. അജിത്കുമാർ സ്ത്രീത്വത്തെ അപമാനിക്കുന്ന വിധത്തിൽ പരാമർശം നടത്തിയെന്നാണ് ആക്ഷേപം. ഇക്കാര്യത്തിൽ നിയമപരമായി പോരാടാൻ ഒരുങ്ങുകയാണ് കോൺഗ്രസ് പാർട്ടി അംഗം കൂടിയായ ഇവർ.