കുളത്തിൽ സാമൂഹിക വിരുദ്ധർ കോഴിമാലിന്യം തള്ളി

ചെറുതുരുത്തി: രൂക്ഷമായ വേനലിൽ കുടിവെള്ളത്തിന് വേണ്ടി നാട് നെട്ടോട്ടമോടുമ്പോൾ ജലസ്രോതസ്സുകൾ മലിനമാക്കി സാമൂഹികവിരുദ്ധരുടെ ക്രൂരത. ദേശമംഗലം പഞ്ചായത്തിൽ അതിരൂക്ഷമായ കുടിവെള്ള ക്ഷാമം അനുഭവപ്പെടുന്ന പല്ലൂരിലുള്ളവർ കുടി വെള്ളത്തിനായി ആശ്രയിക്കുന്ന മുരിക്കുംകുഴി കലയ കുളത്തിൽ സാമൂഹികവിരുദ്ധർ കോഴി മാലിന്യം തള്ളി. ഇതോടെ വെള്ളം ഉപയോഗശൂന്യമായി. ദുർഗന്ധവും അനുഭവപ്പെടുന്നുണ്ട്. ജനങ്ങളുടെ കുടിവെള്ളം മുട്ടിച്ചവർക്കെതിരെ നടപടി ആവശ്യപ്പെട്ട് നാട്ടുകാർ രംഗത്തെത്തി. പഞ്ചായത്തംഗം റഹ്മത്ത് ബീവിയുടെ നേതൃത്വത്തിൽ പൊലീസിലും പഞ്ചായത്ത് അധികൃതർക്കും പരാതി നൽകി.