1000 രൂപ വഴിപാട് ദർശനം; സ്വാഗതം ചെയ്ത് എംപ്ലോയീസ് കോൺഗ്രസ്

ഗുരുവായൂർ: ആയിരം രൂപക്ക് നെയ്വിളക്ക് വഴിപാട് ചെയ്യുന്നവർക്ക് ക്ഷേത്ര ദർശനത്തിന് മുൻഗണന നൽകാനുള്ള തീരുമാനത്തെ കോൺഗ്രസ് അനുകൂല ജീവനക്കാരുടെ സംഘടനകളിൽ ഒന്നായ ദേവസ്വം എംപ്ലോയീസ് കോൺഗ്രസ് സ്വാഗതം ചെയ്തു. ക്ഷേത്രത്തിൽ ഉദയാസ്തമന പൂജ, ചുറ്റുവിളക്ക്, 4500 രൂപയുടെ നെയ് വിളക്ക് എന്നിവ വഴിപാട് ചെയ്യുന്നവർക്ക് പ്രത്യേക ദർശനത്തിനുള്ള സംവിധാനം നേരത്തെ നിലവിലുള്ളതാണെന്നും ചൂണ്ടിക്കാട്ടി. ഈ സൗകര്യം 1000 രൂപയുടെ വഴിപാടുകാർക്ക് കൂടി നൽകിയത് കാലാനുസൃതമായ മാറ്റമാണെന്നും അഭിപ്രായപ്പെട്ടു. 1000 രൂപയുടെ നെയ് വിളക്ക് വഴിപാട് ശീട്ട് ദേവസ്വം ഗെസ്റ്റ് ഹൗസുകൾ വഴിയും നൽകിയാൽ ഭക്തർക്ക് കൂടുതൽ സൗകര്യപ്രദമാകുമെന്നും ചൂണ്ടിക്കാട്ടി. പ്രസിഡൻറ് കെ.ആർ. സുനിൽകുമാർ അധ്യക്ഷത വഹിച്ചു.