മാങ്കുറ്റിപ്പാടത്ത് നെൽച്ചെടികളിൽ ഓലചുരുട്ടിപ്പുഴു ശല്യം

കോടാലി: മറ്റത്തൂര്‍ പഞ്ചായത്തിലെ മാങ്കുറ്റിപ്പാടം പാടശേഖരത്തില്‍ ഓലചുരുട്ടിപ്പുഴുവി​െൻറ ശല്യം കര്‍ഷകര്‍ക്ക് ദുരിതമാകുന്നു. ഞാറുനട്ട് മൂന്നാഴ്ച പ്രായമായ നെൽച്ചെടികളിലാണ് പുഴുക്കളുടെ ശല്യമുള്ളത്. മാങ്കുറ്റിപ്പാടം പാടശേഖരത്തി​െൻറ കിഴക്കന്‍ ഭാഗത്തുള്ള നെല്‍കൃഷിയിലാണ് ഇവ കൂടുതൽ കാണുന്നത്. രണ്ടാം വിള മാത്രം ഇറക്കുന്ന ഈ പാടത്ത് ഇത്തവണ 150 ദിവസത്തെ മൂപ്പുള്ള പൊന്മണി വിത്താണ് മുണ്ടകൻ കൃഷിക്കായി ഉപയോഗിച്ചിരിക്കുന്നത്. കാലാവസ്ഥയിലുണ്ടാകുന്ന മാറ്റമാണ് കീടബാധക്ക് കാരണമാകുന്നതെന്ന് കര്‍ഷകര്‍ പറഞ്ഞു. ഓലചുരുട്ടിപ്പുഴുവി​െൻറ ശല്യം വ്യാപകമായാല്‍ നെല്‍ച്ചെടികളുടെ വളര്‍ച്ചയെ പ്രതികൂലമായി ബാധിക്കുകയും വിളവുകുറയാനിടയാക്കുകയും ചെയ്യും.