പ്രസ്താവന യുദ്ധം തുടരുന്നു; എം.എൽ.എ സഹിഷ്ണുത കാണിക്കണമെന്ന് ഉണ്ണിയാടൻ

ഇരിങ്ങാലക്കുട: മണ്ഡലത്തിലെ വികസന പ്രവർത്തനങ്ങളുടെ ക്രഡിറ്റ് സംബന്ധിച്ച് മുൻ എം.എൽ.എ തോമസ് ഉണ്ണിയാടനും നിലവിലെ എം.എൽ.എ പ്രഫ.കെ.യു.അരുണനും തമ്മിലുള്ള പ്രസ്താവന യുദ്ധം തുടരുന്നു. ഉണ്ണിയാട‍​െൻറ പ്രസ്താവനകൾ ജാള്യം മറക്കാനാണെന്ന അരുണൻ എം.എൽ.എയുടെ പ്രസ്താവനക്ക് മറുപടിയുമായി ഉണ്ണിയാടൻ രംഗത്തെത്തി. യാഥാര്‍ഥ്യം ചൂണ്ടിക്കാണിക്കുമ്പോള്‍ സഹിഷ്ണുത കാണിക്കണമെന്നും വ്യക്തിപരമായി തന്നെ ആക്ഷേപിക്കാന്‍ ശ്രമിക്കുകയല്ല വേണ്ടതെന്നും തോമസ് ഉണ്ണിയാടന്‍ പറഞ്ഞു. യു.ഡി.എഫ് സര്‍ക്കാറി​െൻറ കാലത്ത് ഫണ്ട് അനുവദിച്ച് അതിലേക്ക് ഭരണാനുമതി ലഭിച്ചതാണ് ഠാണാ - കൂടല്‍മാണിക്യം ക്ഷേത്രം റോഡും, പുല്ലൂര്‍ അപകട വളവ് റോഡും. 2015-16 ബജറ്റില്‍ അംഗീകരിച്ചതാണ് മറ്റു മൂന്ന് റോഡുകൾ. ഇത് നിര്‍മാണോദ്ഘാടനം നടത്തിയവര്‍ വിസ്മരിക്കരുതെന്നാണ് താന്‍ ചൂണ്ടിക്കാണിച്ചതെന്നും അദ്ദേഹം പറഞ്ഞു. യു.ഡി.എഫ് സര്‍ക്കാര്‍ ഫണ്ട് അനുവദിച്ചതിനാലാണ് ഈ പ്രവൃത്തികള്‍ക്ക് വകുപ്പ് തല സാങ്കേതികാനുമതി ലഭിച്ചതെന്നും ഇതംഗീകരിക്കാന്‍ എം.എൽ.എ തയാറാകണമെന്നും അദ്ദേഹം പറഞ്ഞു. കെ.എസ്.ആർ.ടി.സി സബ് ഡിപ്പോയെ തരം താഴ്ത്താന്‍ ശ്രമിക്കുന്നത് നാടിനോടുള്ള വഞ്ചനയാണെന്നും ഉണ്ണിയാടന്‍ പറഞ്ഞു.