തൊഴിയൂര്‍ കുഞ്ഞുമുഹമ്മദ് മുസ്‌ലിയാരുടെ ആണ്ട് പരിപാടികള്‍ക്ക്​ ഇന്ന് തുടക്കം

ചാവക്കാട്: സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗമായിരുന്ന തൊഴിയൂര്‍ കുഞ്ഞുമുഹമ്മദ് മുസ്‌ലിയാരുടെ രണ്ടാം ആണ്ടിനോടനുബന്ധിച്ച പരിപാടികൾ ഞായറാഴ്ച തുടങ്ങുമെന്ന് സംഘാടകർ വാര്‍ത്താസമ്മേളനത്തില്‍ അറിയിച്ചു. തൊഴിയൂര്‍ ആസ്ഥാനത്ത് ഞായറാഴ്ച ഖുർആന്‍ പാരായണം ആരംഭിക്കും. സമസ്തക്ക് കീഴിലുള്ള ജില്ലയിലെ മദ്റസകളിലും ഖുര്‍ആന്‍ പാരായണം നടക്കും. രണ്ടാം ആണ്ടു ദിനമായ 26ന് വൈകീട്ട് നാലിന് നടക്കുന്ന സമാപനസമ്മേളനം ഹൈദരലി ശിഹാബ് തങ്ങള്‍ ഉദ്ഘാടനം ചെയ്യും. ദാറുറഹ്മ പ്രസിഡൻറ് പി.കെ. ചേക്കുഹാജി അധ്യക്ഷത വഹിക്കും. രാവിലെ 9.30ന് ഖതമുല്‍ ഖുര്‍ആന്‍ ദുആ മജ്‌ലിസിന് സമസ്ത കേരള ജംഇയ്യത്തുല്‍ ഉലമ കേന്ദ്ര മുശാവറ അംഗം ചെറുവാളൂര്‍ ഹൈദ്രോസ് മുസ്‌ലിയാര്‍ നേതൃത്വം നല്‍കും. പി.ടി. കഞ്ഞുമുഹമ്മദ് മുസ്ലിയാര്‍ ഉദ്ഘാടനം ചെയ്യും. ഉച്ചക്ക് 2.30ന് അനുസ്മരണ സമ്മേളനം എസ്.കെ.ജെ.യു ജില്ല ജനറല്‍ സെക്രട്ടറി എം.എം. മുഹ്‌യിദ്ദീന്‍ മുസ്‌ലിയാര്‍ ആലുവ ഉദ്ഘാടനം ചെയ്യും. ദാറുറഹ്മ സെക്രട്ടറി അബ്ദുൽകരീം ഫൈസി, മാനേജര്‍ ജാഫര്‍ സാദിഖ്, ദാറു റഹ്മ വാഫി കോളജ് വൈസ് പ്രിന്‍സിപ്പൽ മഅ്റൂഫ് വാഫി എന്നിവര്‍ വാർത്താസമ്മേളനത്തിൽ സംബന്ധിച്ചു.