റോഡെന്ന് പറയരുത് പ്ലീസ്; ഇത് ചളിക്കുണ്ടാണ്

അന്തിക്കാട്: കാരമുക്ക്- അഞ്ചങ്ങാടി റോഡ് തകർന്ന് ചളിക്കുണ്ടായതോടെ വാഹനയാത്ര ദുഷ്കരം. ഏറെ നാളായി തകർന്നുകിടക്കുന്ന റോഡ് അറ്റകുറ്റപ്പണി നടത്താൻ അധികൃതർ ഇതുവരെ തയാറായിട്ടില്ല. വലിയ കുഴികൾ രൂപപ്പെട്ടതോടെ കുഴികളിൽ വെള്ളം നിറഞ്ഞുകിടക്കുകയാണ്. ഇതോടെ അപകടങ്ങളും വർധിച്ചു. ജില്ല പഞ്ചായത്തി​െൻറ അധീനതയിലുള്ളതാണ് റോഡ്. റോഡ് നന്നാക്കാൻ അധികൃതർ ഒരു നടപടിയും കൈക്കൊള്ളാത്തതിൽ നാട്ടുകാർ പ്രതിക്ഷേധത്തിലാണ്. ജില്ല പഞ്ചായത്ത് നടപടി കൈക്കൊള്ളണമെന്ന് അന്തിക്കാട് ഉപഭോക്തൃ സംരക്ഷണ സമിതി പ്രസിഡൻറ് ടി.ആർ. പുഷ്പാംഗദൻ ആവശ്യപ്പെട്ടു.