സ്ത്രീകളെ ആക്രമിച്ച് ആഭരണക്കവര്‍ച്ച പതിവാക്കിയ യുവാവ് പിടിയില്‍

തൃശൂര്‍: കേച്ചേരിയില്‍ വയോധികയുടെ മാല പൊട്ടിക്കുകയും ചെവി മുറിച്ച് കമ്മല്‍ കവരാന്‍ ശ്രമിക്കുകയും ചെയ്ത കേസില്‍ പ്രതിയെ ഷാഡോ പൊലീസ് പിടികൂടി. മുക്കാട്ടുകര സ്വദേശി പയ്യപ്പാട്ടില്‍ യേശുദാസനാണ്(30) അറസ്റ്റിലായത്. കേച്ചേരി പട്ടിക്കര കാപ്രശ്ശേരി റോഡില്‍ കളരിക്കല്‍ ബാലന്‍െറ ഭാര്യ അംബുജാക്ഷിയമ്മയാണ്(89) ഈമാസം ഏഴിന് കവര്‍ച്ചക്കിരയായത്. വീടിന്‍െറ വരാന്തയില്‍ കുട്ടികളുമൊത്ത് ഇരിക്കുകയായിരുന്നു അവര്‍. കുട്ടികള്‍ അകത്തേക്കുപോയ സമയത്ത് കയറിവന്ന യുവാവ് മാല പൊട്ടിക്കുകയും കമ്മല്‍ പറിച്ചെടുക്കാന്‍ ശ്രമിക്കുകയുമായിരുന്നു. പിടിവലിക്കിടെ ചെവിമുറിഞ്ഞു. നിലവിളി കേട്ട് വീട്ടുകാര്‍ എത്തിയതോടെ കമ്മല്‍ ഉപേക്ഷിച്ച് കള്ളന്‍ രക്ഷപ്പെട്ടു. ഇതേദിവസം മരത്താക്കര പടവരാട് റോഡില്‍ തോണിപ്പറമ്പില്‍ വിജയന്‍െറ വീട്ടിലെ അടുക്കളയില്‍ കയറി ഭാര്യ ഓമനയുടെ(59) രണ്ടര പവന്‍െറ മാല പൊട്ടിച്ച കേസിന്‍െറ അന്വേഷണത്തിനിടെയാണ് യേശുദാസന്‍ പിടിയിലായത്. മുണ്ടും കുപ്പായവും ധരിച്ച് എത്തിയ 35 വയസ്സ് തോന്നിക്കുന്ന യുവാവാണ് മാല പൊട്ടിച്ചതെന്നും ബൈക്കിലാണ് രക്ഷപ്പെട്ടതെന്നും ഓമന പൊലീസിന് മൊഴി നല്‍കി. നിരവധി ഇതരസംസ്ഥാന തൊഴിലാളികളെയും ഇത്തരം കേസുകളില്‍ ഉള്‍പ്പെട്ടവരെയും ഗുണ്ടാംസംഘങ്ങളെയും പൊലീസ് ചോദ്യംചെയ്തിരുന്നു. കവര്‍ച്ച നടന്ന സ്ഥലത്തിനടുത്തെ സ്ഥാപനങ്ങളിലെയും വീടുകളിലെയും സി.സി ടി.വി കാമറകള്‍ പരിശോധിച്ചെങ്കിലും തെളിവ് ലഭിച്ചില്ല. രക്ഷപ്പെടുന്നതിനിടെ യുവാവിന്‍െറ ചെരിപ്പ് വീടിന്‍െറ പരിസരത്ത് നഷ്ടപ്പെട്ടിരുന്നു. ഇതാണ് അന്വേഷണത്തില്‍ തുമ്പായത്. ആഗസ്റ്റ് 17ന് അമല ആശുപത്രിക്കടുത്ത് അടക്ക മാര്‍ക്കറ്റ് റോഡില്‍ എടശ്ശേരി വളപ്പില്‍ അയ്യപ്പന്‍െറ ഭാര്യ ശാരദാമ്മയുടെ(78) മാല ബൈക്കിലത്തെി പൊട്ടിച്ചതും എതിര്‍ത്തപ്പോള്‍ ചവിട്ടിവീഴ്ത്തിയതായും പ്രതി സമ്മതിച്ചതായി പൊലീസ് പറഞ്ഞു.