ഐ.ജി സുരേഷ്രാജ് പുരോഹിതിന് സ്ഥാനചലനം

തൃശൂര്‍: പൊലീസ് തലപ്പത്തെ അഴിച്ചു പണിയില്‍ ജില്ലയിലെ പൊലീസ് മേധാവികള്‍ക്കും സ്ഥാനചലനം. കമീഷണര്‍ക്കും, റൂറല്‍ എസ്.പിക്കുമൊപ്പം പൊലീസ് അക്കാദമിയില്‍ അപ്രഖ്യാപിത ബീഫ് നിരോധമേര്‍പ്പെടുത്തിയും, പ്രായപൂര്‍ത്തിയാകാത്ത മകനെ കൊണ്ട് ഒൗദ്യോഗിക വാഹനമോടിപ്പിച്ചും വിവാദത്തിലായ ഐ.ജി സുരേഷ്രാജ് പുരോഹിതിനെയും സ്ഥലം മാറ്റി. പൊലീസ് ഹെഡ്ക്വാര്‍ട്ടേഴ്സിലേക്കാണ് പുരോഹിതിനെ മാറ്റിയത്. ജെ.ഹിമേന്ദ്രനാഥാണ് പുതിയ സിറ്റി പൊലീസ് കമീഷണര്‍. പൊലീസ് ടെലികമ്യൂണിക്കേഷന്‍ എസ്.പിയായിരുന്നു ഹിമേന്ദ്രനാഥ്. കമീഷണറായിരുന്ന കെ.ജി. സൈമണ് പുതിയ നിയമനം നല്‍കിയിട്ടില്ല. ആര്‍. നിശാന്തിനിയാണ് റൂറല്‍ എസ്പി. നേരത്തെ തൃശൂര്‍ സിറ്റി കമീഷണറായിരുന്നു നിശാന്തിനി. നിലവില്‍ വിജിലന്‍സ് എറണാകുളം എസ്.പിയായിരുന്നു. റൂറല്‍ എസ്.പി ആയ കാര്‍ത്തികിനെ വയനാട്ടിലേക്ക് മാറ്റി.