സമഗ്ര കാര്‍ഷിക വികസനം ലക്ഷ്യം –മന്ത്രി

കൊടുങ്ങല്ലൂര്‍: കാര്‍ഷിക മേഖലയില്‍ സുസ്ഥിര വികസനം ലക്ഷ്യമിട്ടുള്ള സമഗ്ര കാര്‍ഷിക നയം സര്‍ക്കാര്‍ ആവിഷ്കരിച്ചുവരുകയാണെന്ന് കൃഷി മന്ത്രി അഡ്വ. വി.എസ്. സുനില്‍ കുമാര്‍. അഗ്രികള്‍ചറല്‍ ടെക്നോളജി മാനേജ്മെന്‍റ് ഏജന്‍സി (ആത്മ) ജീവനക്കാരുടെ സംഘടനയായ ആത്മ സ്റ്റാഫ് അസോസിയേഷന്‍ കര്‍ഷക സംഗമം ശ്രീനാരായണപുരത്ത് ഉദ്ഘാടനം ചെയ്യുകയായിരുന്നു അദ്ദേഹം. പ്രകൃതി സംരക്ഷണം, കര്‍ഷക സംരക്ഷണം, ആരോഗ്യ സംരക്ഷണം എന്നിവയിലൂടെ കാര്‍ഷിക മേഖലയില്‍ അടിസ്ഥാനപരമായ മാറ്റങ്ങള്‍ കൊണ്ടുവരും. ക്ളസ്റ്റര്‍ രൂപവത്കരിച്ച് താഴത്തെട്ടില്‍ വരെ വിപണിയുടെ സാന്നിധ്യം ഉറപ്പാക്കും. കൃഷി വകുപ്പിന്‍െറ കീഴിലുള്ള പൊതുമേഖലാ സ്ഥാപനങ്ങളെ ശക്തിപ്പെടുത്തുമെന്നും അദ്ദേഹം കൂട്ടിച്ചേര്‍ത്തു. കര്‍ഷകസാന്നിധ്യംകൊണ്ട് ശ്രദ്ധേയമായ പരിപാടിയില്‍ വിവിധ സ്റ്റാളുകളുടെ പ്രദര്‍ശനവും വില്‍പനയും നടന്നു. കര്‍ഷകര്‍ക്കുള്ള ഫലവൃക്ഷത്തൈ വിതരണം മന്ത്രി ഉദ്ഘാടനം ചെയ്തു. ഇ.ടി. ടൈസന്‍ എം.എല്‍.എ അധ്യക്ഷത വഹിച്ചു. വി.ആര്‍. സുനില്‍ കുമാര്‍ എം.എല്‍.എ മുഖ്യാതിഥിയായിരുന്നു. ആത്മ പ്രോജക്ട് ഡയറക്ടര്‍ വി.എസ്. റോയ് കാര്‍ഷിക സെമിനാര്‍ നയിച്ചു. ആത്മ മുന്‍ ഡയറക്ടര്‍ മേഴ്സി തോമസ് പദ്ധതി വിശദീകരിച്ചു. കെ.കെ. ആബിദലി, നൗഷാദ് കൈതവളപ്പില്‍, ഇ.കെ. മല്ലിക, സനുരാജ്, ടി. നിഷില്‍, ശ്യാം, അജീഷ്, സിനിമോള്‍ തുടങ്ങിയവര്‍ സംസാരിച്ചു. ആത്മയിലൂടെ കാര്‍ഷിക വിജയം നേടിയ അബ്ദുറസാഖ് മൊറയൂര്‍, തോമസ് വെട്ടത്ത് വെറ്റിലപ്പാറ, റഷീദ് ചെമ്മല നിലമ്പൂര്‍, ഷാജഹാന്‍ മുളവുകാട് എറണാകുളം എന്നിവര്‍ ജീവിതാനുഭവങ്ങള്‍ പങ്കുവെച്ചു. സ്വാഗതസംഘം ചെയര്‍മാന്‍ ഇ.വി. രമേശന്‍ സ്വാഗതവും ആത്മ സ്റ്റാഫ് അസോസിയേഷന്‍ സംസ്ഥാന ട്രഷറര്‍ ശ്യാംകുമാര്‍ നന്ദിയും പറഞ്ഞു.