സംഘടനകളുടെ നിവേദനം പഞ്ചായത്ത് ഭരണസമിതി തള്ളി

തൃപ്രയാര്‍: നാട്ടിക സെന്‍ററില്‍ ഹൈമാസ്റ്റ് ലൈറ്റ് സ്ഥാപിച്ചത് തെളിക്കണമെന്ന ഡി.വൈ.എഫ്.ഐ നാട്ടിക പഞ്ചായത്ത് കമ്മിറ്റി, നാട്ടിക ഉപഭോക്തൃ സമിതി എന്നിവയുടെ ആവശ്യം പഞ്ചായത്ത് ഭരണസമിതി തള്ളി. ലൈറ്റ് സ്ഥാപിക്കുന്നത് സംബന്ധിച്ച് എം.എല്‍.എയുടെ കത്ത് ആവശ്യമാണ്. ഇത് ലഭിക്കാതെ ലൈറ്റ് തെളിക്കാനുള്ള നടപടികളെടുക്കാനാവില്ല. ഈ തീരുമാനം പഞ്ചായത്ത് മുമ്പേ തന്നെ എടുത്തിട്ടുള്ളതാണ്. അതില്‍ മാറ്റമില്ല. അതിനാല്‍ ഡി.വൈ.എഫ്.ഐ, ഉപഭോക്തൃ സമിതി എന്നിവയുടെ ആവശ്യം യോഗത്തില്‍ അജണ്ടയായി സ്വീകരിക്കേണ്ടന്ന് പറഞ്ഞാണ് പ്രസിഡന്‍റ് പി. വിനു ഇവരുടെ ആവശ്യം തള്ളിക്കളഞ്ഞത്. അതേസമയം, ഗ്രാമപഞ്ചായത്തിനെ ഒഴിവാക്കി തളിക്കുളം ബ്ളോക് പഞ്ചായത്ത് പ്രശ്നം ഏറ്റെടുക്കാനുള്ള നീക്കം നടത്തുന്നുണ്ട്. വൈദ്യുതി ചാര്‍ജും മെയ്ന്‍റനന്‍സും ബ്ളോക് പഞ്ചായത്ത് ഏറ്റെടുത്ത് നല്‍കുമെന്നും ഈ വ്യവസ്ഥയില്‍ ലൈറ്റ് തെളിയിക്കാനാകുമെന്നുമാണ് ബ്ളോക് പഞ്ചായത്തിന്‍െറ വാദം. ഇതിന്‍െറ നടപടികള്‍ തുടര്‍ന്ന് വരുകയാണ്. ഇതുസംബന്ധിച്ച് കഴിഞ്ഞ ദിവസം ബ്ളോക് പഞ്ചായത്ത് യോഗത്തില്‍ ചര്‍ച്ച വന്നപ്പോള്‍ കോണ്‍ഗ്രസ് അംഗങ്ങള്‍ എതിര്‍ത്തിരുന്നു. പഞ്ചായത്തീരാജ് നിയമത്തെ സംബന്ധിച്ച് ഗീത ഗോപി എം.എല്‍.എക്ക് അറിയാത്തതിനാലാണ് ബ്ളോക് പഞ്ചായത്തിനെ സമീപിച്ചതെന്ന് കോണ്‍ഗ്രസ് അംഗങ്ങള്‍ ആരോപിച്ചു. ഗീത ഗോപി എം.എല്‍.എ ആസ്തി വികസന ഫണ്ടില്‍ നിന്നും 2.75 ലക്ഷം ചെലവഴിച്ചാണ് ഡിസംബര്‍ 31ന് നാട്ടിക സെന്‍ററില്‍ ഹൈമാസ്റ്റ് ലൈറ്റ് സ്ഥാപിച്ചത്. വൈദ്യുതി ചാര്‍ജ് അടക്കേണ്ടത് ഗ്രാമപഞ്ചായത്താണെന്നും അതിന്‍െറ നടപടി പൂര്‍ത്തിയാക്കാന്‍ ലൈറ്റ് സ്ഥാപിക്കുന്നത് സംബന്ധിച്ച് എം.എല്‍.എ കത്ത് നല്‍കേണ്ടതുണ്ടെന്നും കാണിച്ച് പഞ്ചായത്ത് വൈദ്യുതി വിച്ഛേദിച്ചിരിക്കുകയാണ്.