പട്ടികജാതിക്കാരനെ വെട്ടിയ കേസില്‍ അമ്മയും മക്കളും അറസ്റ്റില്‍

പഴയന്നൂര്‍: പട്ടികജാതിക്കാരനെ ജാതിപ്പേര് വിളിച്ച് അധിക്ഷേപിക്കുകയും വെട്ടിപ്പരിക്കേല്‍പിക്കുകയും ചെയ്ത കേസില്‍ അയല്‍വാസികളായ അമ്മയും മക്കളും അറസ്റ്റില്‍. പാണന്‍ സമുദായത്തില്‍പെട്ട പഴയന്നൂര്‍ തെക്കത്തേറ കിഴക്കേതില്‍ അറുമുഖന്‍െറ മകന്‍ കണ്ണന്‍െറ (50) പരാതിയിലാണ് നടപടി. പഴയന്നൂര്‍ തേക്കത്തേറ പനച്ചിനാനക്കല്‍ ജോര്‍ജിന്‍െറ ഭാര്യ മേരി (68), മക്കളായ രൂപന്‍ (38), നിഷ (അശ്വതി-30) എന്നിവരെയാണ് അറസ്റ്റ് ചെയ്തത്. പട്ടികജാതി സംരക്ഷണ നിയമപ്രകാരം കേസെടുത്ത് കുന്നംകുളം ഡിവൈ.എസ്.പിയുടെ നേതൃത്വത്തിലായിരുന്നു അറസ്റ്റ്. മൂവരെയും കോടതി റിമാന്‍ഡ് ചെയ്തു. കുടിവെള്ളത്തിനായി അടുത്തുള്ള ആളൊഴിഞ്ഞ പറമ്പില്‍നിന്ന് കണ്ണന്‍െറ വീട്ടിലേക്ക് റോഡിന് കുറുകെ ഇട്ട പൈപ്പ് രൂപന്‍ ബൈക്ക് കയറ്റി പൊട്ടിച്ചത് സംബന്ധിച്ച തര്‍ക്കമാണ് സംഭവങ്ങളുടെ തുടക്കം. ഇവര്‍ തമ്മില്‍ വര്‍ഷങ്ങളായി അതിര്‍ത്തി തര്‍ക്കം നിലനിന്നിരുന്നതായി പൊലീസ് അറിയിച്ചു.