ഫ്രീസര്‍ തകരാറില്‍; അറ്റകുറ്റപ്പണിക്ക് നടപടിയില്ല

മാള: മൃതദേഹം സൂക്ഷിക്കാനുള്ള മാള കെ. കരുണാകരന്‍ സ്മാരക സാമൂഹികാരോഗ്യ കേന്ദ്രത്തിലെ ശീതീകരണി തകരാറില്‍. ദിനേന 550 രൂപ നിരക്കില്‍ ഇത് വാടകക്ക് നല്‍കിയിരുന്നു. യന്ത്രത്തകരാര്‍ വന്നതോടെ കൊടുക്കാറില്ല. തകരാര്‍ പരിഹരിക്കാന്‍ മാള ബ്ളോക് പഞ്ചായത്തിനു കീഴിലുള്ള ആശുപത്രിക്കായിട്ടില്ല. 3,500 രൂപ നിരക്കിലാണ് സ്വകാര്യ സ്ഥാപനങ്ങള്‍ ഫ്രീസര്‍ നല്‍കുന്നത്. നാളുകളായി പണിമുടക്കിയ ഫ്രീസറിന്‍െറ തകരാര്‍ ഉടന്‍ പരിഹരിക്കണമെന്ന് മാള പ്രതികരണ വേദി ആവശ്യപ്പെട്ടു. പ്രസിഡന്‍റ് സലാം ചൊവ്വര, ഹനീഷ് സ്രാമ്പിയേക്കല്‍, വി.കെ. ജോണ്‍സണ്‍, വി.എസ്. നിസാര്‍, ഹര്‍ഷാദ്, സി.എ. സമദ്, ഹനീഫ മണ്ണാന്തറ എന്നിവര്‍ സംസാരിച്ചു.