നിക്ഷേപ തട്ടിപ്പ്: കുറി കമ്പനി ഉടമ അറസ്റ്റില്‍

കുന്നംകുളം: പലരില്‍നിന്നായി ലക്ഷങ്ങള്‍ തട്ടിയെടുത്ത കേസില്‍ കുന്നംകുളം വീചിക കുറി തലവന്‍ വീണ്ടും അറസ്റ്റില്‍. മാനേജിങ് ഡയറക്ടറായ വാസുദേവനെയാണ് (ഭാരത് വാസു -55) കുന്നംകുളം പൊലീസ് അറസ്റ്റ് ചെയ്തത്. തട്ടിപ്പിനിരയായ നിക്ഷേപകര്‍ കുന്നംകുളം കോടതിയില്‍ നല്‍കിയ പരാതിയെ തുടര്‍ന്നാണ് അറസ്റ്റ്. നിക്ഷേപകര്‍ക്ക് പണം നല്‍കാതെ ലക്ഷങ്ങള്‍ തട്ടിയെടുത്തെന്നാണ് പരാതി. വാസുവിന് പുറമെ മറ്റൊരു മാനേജിങ് ഡയറക്ടര്‍ ശ്രീധരന്‍, ഡയറക്ടര്‍മാരായ ഹസീന, ഇന്ദിര, മാനേജര്‍മാരായ ഷാജന്‍, രാഖി എന്നിവര്‍ക്ക് എതിരെയും കേസെടുത്തിട്ടുണ്ട്. മാസങ്ങള്‍ക്ക് മുമ്പ് മറ്റൊരു കേസില്‍ ഇവരെ അറസ്റ്റ് ചെയ്തിരുന്നു. പിന്നീട് ജയിലില്‍ കഴിഞ്ഞ ഇവര്‍ ജാമ്യത്തില്‍ ഇറങ്ങിയതാണ്. നിരവധി നിക്ഷേപകരാണ് കുന്നംകുളം പൊലീസില്‍ പരാതി നല്‍കിയത്. കുന്നംകുളം കേന്ദ്രീകരിച്ച് പ്രവര്‍ത്തിച്ച വീചിക കുറി കമ്പനിക്ക് ജില്ലക്ക് പുറമെ മലപ്പുറം, എറണാകുളം, ഇടുക്കി ജില്ലകളിലും ശാഖകളുണ്ടായിരുന്നു. ഈ ശാഖകള്‍ കേന്ദ്രീകരിച്ചും നിക്ഷേപ തട്ടിപ്പ് നടത്തി.