ചെന്നൈ ദുരന്ത സഹായത്തിനായി കൂട്ടായ്മകള്‍ സജീവം

കൊടുങ്ങല്ലൂര്‍: ദുരിതത്തില്‍ അകപ്പെട്ട ചെന്നൈക്ക് സഹായ ഹസ്തവുമായി അലര്‍ട്ട് കൊടുങ്ങല്ലൂരും. കൊടുങ്ങല്ലൂരിലെ ജീവകാരുണ്യ സംഘടനയായ അലര്‍ട്ട് പ്രളയക്കെടുതിയില്‍ അകപ്പെട്ട ചെന്നെവാസികള്‍ക്കായി സമാഹരിച്ച ഭക്ഷണ പദാര്‍ഥങ്ങള്‍ കൊടുങ്ങല്ലൂര്‍ സി.ഐ എന്‍.എസ്. സലീഷ് കൈമാറി. അലര്‍ട്ട് പ്രസിഡന്‍റ് അഡ്വ. അബ്ദുല്‍ഖാദര്‍ കണ്ണെഴുത്ത് അധ്യക്ഷത വഹിച്ചു. ബഷീര്‍ കൊല്ലത്തുവീട്ടില്‍ അനുശോചന പ്രമേയം അവതരിപ്പിച്ചു. നഗരസഭ വികസന സ്റ്റാന്‍ഡിങ് കമ്മിറ്റി ചെയര്‍മാന്‍ കെ.എസ്. കൈസാബ്, സ്റ്റാന്‍ലി, കെ.എന്‍. പ്രകാശന്‍, അഷറഫ് പൂവ്വത്തിങ്കല്‍ എന്നിവര്‍ സംസാരിച്ചു. സെക്രട്ടറി എന്‍.എസ്. മധുസൂദനന്‍ സ്വാഗതവും എന്‍.എം. അബ്ദുല്‍ഖാദര്‍ നന്ദിയും പറഞ്ഞു. ഫേസ്ബുക് കൂട്ടായ്മ കൊടുങ്ങല്ലൂര്‍: പ്രളയം വിഴുങ്ങിയ തമിഴ്നാട്ടിലെ സഹജീവികളുടെ ദുരന്തം നെഞ്ചേറ്റിയ കൊടുങ്ങല്ലൂരിലെ മനുഷ്യ സ്നേഹികളുടെ കൂട്ടായ്മയില്‍ സമാഹരിച്ച ഒരു ലോഡ് അവശ്യവസ്തുക്കള്‍ ചെന്നൈയിലേക്ക് അയച്ചു. 4000 ബോട്ടില്‍ മിനറല്‍ വാട്ടര്‍ 30 കാര്‍ട്ടണ്‍ ബിസ്ക്കറ്റ്, 30 ചാക്ക് വസ്ത്രങ്ങള്‍, മരുന്ന്, കൊതുക് തിരികള്‍, മാസ്ക്ക്, ഡെറ്റോള്‍ തുടങ്ങിയ വസ്തുക്കളാണ് 24 മണിക്കൂറിനകം ശേഖരിച്ചത്. കൊടുങ്ങല്ലൂര്‍ ഫേസ്ബുക്ക് കൂട്ടായ്മയുടെ കീഴില്‍ പൊലീസ് മൈതാനം കേന്ദ്രീകരിച്ചാണ് ദുരിതാശ്വാസ വസ്തുക്കളുടെ സമാഹരണം നടത്തുന്നത്. ആദ്യ ലോഡ് ശനിയാഴ്ച രാത്രിയോടെ ചെന്നൈയിലേക്ക് തിരിച്ചതായി സംഘാടകര്‍ അറിയിച്ചു. സാംസ്കാരിക സംഘടനകളും പ്രവര്‍ത്തകരും ഓട്ടോടാക്സി തൊഴിലാളികളും റസിഡന്‍റ്സ് അസോസിയേഷനുകളും വിദ്യാര്‍ഥികളും നന്മനിറഞ്ഞ സംരംഭത്തില്‍ പങ്കാളികളായി. മുഹമ്മദ് റെബേക്ക്, ഷെയാസ്, അനു, രാജേഷ്, സുനേഷ്, ജിയാദ്, ഷിഹാസ്, സിജോ, അഭിലാഷ്, ആല്‍ഫി എന്നിവര്‍ നേതൃത്വം നല്‍കി. അടുത്തഘട്ടം എട്ടാം തീയതിക്കകം ആരംഭിക്കുമെന്ന് മുഹമ്മദ് റെബിയും ഫാരിസും അറിയിച്ചു. കൈത്താങ്ങായി വിദ്യാര്‍ഥികളും കൊടുങ്ങല്ലൂര്‍: പ്രളയക്കെടുതിയില്‍ അകപ്പെട്ടവര്‍ക്ക് കുടിനീരേകാന്‍ കൊടുങ്ങല്ലൂരിലെ വിദ്യാര്‍ഥിനികളും . കൊടുങ്ങലൂര്‍ ഗവ. ഗേള്‍സ് ഹയര്‍ സെക്കന്‍ഡറി സ്കൂളില്‍ എന്‍.എസ്.എസ് വളന്‍റിയര്‍മാരായ വിദ്യാര്‍ഥികളാണ് തമിഴ്നാട്ടിലെ മനുഷ്യര്‍ക്ക് തങ്ങളാല്‍ കഴിയുന്ന സഹായമത്തെിക്കാന്‍ മുന്നോട്ട് വന്നത്. പ്ളാസ്റ്റിക് നിര്‍മാര്‍ജന പ്രവര്‍ത്തനങ്ങളുടെ ഭാഗമായി എന്‍.എസ്.എസ് വളന്‍റിയര്‍മാര്‍ ശേഖരിച്ച കുപ്പികള്‍ ശുചീകരിച്ച് വീടുകളില്‍ നിന്ന് കൊണ്ടുവന്ന ശുദ്ധജലം അവര്‍ തമിഴ്നാട്ടിലേക്ക് അയക്കുകയാണ്. എന്‍.എസ്.എസ് പ്രോഗ്രാം ഓഫിസര്‍ സി.കെ. ബേബി , പ്രിന്‍സി ഷാന്‍, ആശാ ആനന്ദ്, പി.ടി.എ പ്രസിഡന്‍റ് പി.എച്ച്. അബ്ദുല്‍ റഷീദ്, അധ്യാപകരായ മേഴ്സിപോള്‍, കമലം, സ്മിത, മിഷ, എലിസബത്ത് എന്നിവര്‍ മേല്‍നോട്ടം വഹിച്ചു.