കരനെല്‍കൃഷിക്ക് തുടക്കം; ആഘോഷമാക്കി നാട്ടുകാര്‍

അടൂര്‍: കാര്‍ഷിക മേഖലയില്‍ നെല്ലുല്‍പാദന രംഗത്തെ പ്രതിസന്ധിക്ക് പരിഹാരം കാണാന്‍ ദീപം സ്വയം സഹായ സംഘം കരനെല്‍കൃഷിക്ക് തുടക്കമിട്ടു. കടമ്പനാട് ഗ്രാമപഞ്ചായത്ത് മലനട ഒന്നാം വാര്‍ഡില്‍ കുണ്ടോംവെട്ടത്ത് മലനട ഗണേശവിലാസം ക്ഷേത്രത്തിനു സമീപം മൂന്ന് ഏക്കര്‍ പുരയിടത്തില്‍ എട്ടു പേരടങ്ങുന്ന സംഘമാണ് കരനെല്‍കൃഷി ആരംഭിച്ചത്. തൊഴിലുറപ്പ് തൊഴിലാളികളുടെ സഹായത്തോടെ തരിശുകിടന്ന ഭൂമി ഒരുക്കി നെല്‍കൃഷിക്ക് അനുയോജ്യമാക്കി. ചിറ്റയം ഗോപകുമാര്‍ എം.എല്‍.എ ഉദ്ഘാടനം നിര്‍വഹിച്ചു. ഗ്രാമപഞ്ചായത്ത് പ്രസിഡന്‍റ് എ.ആര്‍. അജീഷ് കുമാര്‍ അധ്യക്ഷതവഹിച്ചു. പറക്കോട് ബ്ളോക് പഞ്ചായത്ത് വൈസ് പ്രസിഡന്‍റ് എസ്. രാധാകൃഷ്ണന്‍, ക്ഷേമകാര്യ സ്ഥിരം സമിതി അധ്യക്ഷ മോനി കുഞ്ഞുമോന്‍, ഗ്രാമപഞ്ചായത്ത് അംഗം ജെ. സതി, കുടുംബശ്രീ ജില്ലാ മിഷന്‍ കോഓഡിനേറ്റര്‍ സക്കീര്‍ ഹുസൈന്‍, ഉണ്ണികൃഷ്ണന്‍, അമ്പിളി രാജന്‍, ജയശ്രീ കൃഷ്ണന്‍ എന്നിവര്‍ സംസാരിച്ചു.