കോടതി സമുച്ചയ നിര്‍മാണം: മൂന്ന് ഉന്നത ഉദ്യോഗസ്ഥര്‍ക്കെതിരെ ബാര്‍ അസോ. ഹൈകോടതിയില്‍

പത്തനംതിട്ട: പത്തനംതിട്ടയില്‍ കോടതി സമുച്ചയ നിര്‍മാണത്തിന് സ്ഥലം ഏറ്റെടുക്കാന്‍ കലക്ടറെ അധികാരപ്പെടുത്തി ഉത്തരവിറക്കിയതില്‍ വീഴ്ച വരുത്തിയ മൂന്ന് ഉന്നത ഉദ്യോഗസ്ഥര്‍ക്കെതിരെ ബാര്‍ അസോ. ഹൈകോടതിയില്‍ കോടതി അലക്ഷ്യ ഹരജി ഫയല്‍ ചെയ്തു. ചീഫ് സെക്രട്ടറി, പി.കെ. മൊഹന്തി, അഡീഷനല്‍ ചീഫ് സെക്രട്ടറി നളിനി നെറ്റോ, റവന്യൂ പ്രിന്‍സിപ്പല്‍ സെക്രട്ടറി ഡോ. വിശ്വാസ് മത്തോ എന്നിവര്‍ക്കെതിരെ കോടതി അലക്ഷ്യ നടപടിയെടുക്കാനുള്ള ഹരജിയില്‍ കാരണം കാണിക്കല്‍ നോട്ടീസ് ഉത്തരവായി. ബാര്‍ അസോ. പ്രസിഡന്‍റ് അഡ്വ. പീലിപ്പോസ് തോമസ്, സെക്രട്ടറി അഡ്വ. ബിജു എം. തങ്കച്ചന്‍ എന്നിവര്‍ അഡ്വ. ഫിലിപ് മാത്യൂസ് വി. മുഖേന സമര്‍പ്പിച്ച കോടതി അലക്ഷ്യ ഹരജിയില്‍ ജസ്റ്റിസ് എ. മുഹമ്മദ് മുഷ്താഖ് ആണ് നോട്ടീസ് ഉത്തരവിട്ടത്. റിങ് റോഡിനോട് ചേര്‍ന്നുള്ള ആറ് ഏക്കര്‍ നിലം കോടതി സമുച്ചയത്തിനായി നികത്താനായി നെല്‍വയല്‍ തണ്ണീര്‍ത്തട സംരക്ഷണ നിയമം പ്രകാരം അനുമതി നല്‍കി സര്‍ക്കാര്‍ 2012 ഏപ്രിലില്‍ തന്നെ ഉത്തരവ് പുറപ്പെടുവിച്ചിരുന്നു.