റാന്നിയില്‍ ഗ്രാമീണ റോഡുകള്‍ക്ക് 44.5 ലക്ഷം

റാന്നി: പഞ്ചായത്തിലെ രണ്ടു ഗ്രാമീണറോഡുകളുടെ പുനരുദ്ധാരണത്തിന് 44,48,000 രൂപ അനുവദിച്ചു. റാന്നി പഞ്ചായത്ത് പത്താം വാര്‍ഡില്‍പെട്ട ഉതിമൂട്-മരുതിക്കാലാപ്പടി-വെളിവയല്‍ റോഡിന് 27,23,000 രൂപയും രണ്ടാം വാര്‍ഡില്‍പെട്ട എം.എസ്.എച്ച്.എസ്.എസ് പടി-വെട്ടിമൂട്ടില്‍പടി റോഡിന്‍െറ സംരക്ഷണഭിത്തി നിര്‍മിക്കുന്നതിന് 16,75,000 രൂപയുമാണ് അനുവദിച്ചത്. റാന്നി നിയോജക മണ്ഡലാതിര്‍ത്തിയില്‍ കൂടി കടന്നുപോകുന്ന റോഡാണ് ഉതിമൂട്-മരുതിക്കാലാപ്പടി-വെളിവയല്‍ റോഡ്. പുനൂര്‍-മൂവാറ്റുപുഴ സംസ്ഥാന പാതക്ക് സമാന്തരമായി ഉതിമൂട് മുതല്‍ മേക്കൊഴൂര്‍വഴി മൈലപ്ര പഞ്ചായത്ത് ജങ്ഷന്‍വരെ ബന്ധിപ്പിക്കാന്‍ കഴിയുന്ന റോഡാണിത്. റോഡ് പുനരുദ്ധരിക്കുന്നതോടെ സംസ്ഥാന പാതയില്‍ ഗതാഗതതടസ്സം ഉണ്ടായാല്‍ സമാന്തരപാതയായി ഈ റോഡ് ഉപകരിക്കും. അനപ്പാറമലയില്‍നിന്നുള്ള മലവെള്ളത്തിന്‍െറ കുത്തൊഴുക്കില്‍ വശം ഇടിഞ്ഞ് സ്കൂള്‍ മുറ്റത്തേക്ക് വീണ് സ്കൂള്‍ കുട്ടികള്‍ക്കും വഴിയാത്രക്കാര്‍ക്കും ഒരുപോലെ അപകടഭീഷണി ഉയര്‍ത്തി നില്‍ക്കുകയാണ് എം.എസ്.എച്ച്.എസ്.എസ്-വെട്ടിമൂട്ടില്‍പടി റോഡ്. 20 അടിയിലധികം ഉയരമുള്ള തിട്ടയുടെ ബാക്കിഭാഗം എതുസമയത്തും നിലംപൊത്താവുന്ന സ്ഥിതിയാണ്.