കുന്നുംപുറം–കൂരിമുക്ക്–ചത്തെല്ലൂര്‍ റോഡ് നവീകരണ ആവശ്യം ശക്തം

തച്ചനാട്ടുകര: കുന്നുംപുറം-കൂരിമുക്ക്-ചത്തെല്ലൂര്‍ റോഡ് നവീകരിക്കണമെന്ന ആവശ്യം ശക്തമാകുന്നു. വീതി കുറഞ്ഞ റോഡിലൂടെ വലിയ വാഹനങ്ങള്‍ക്ക് യാത്ര പ്രയാസകരമാണ്. വര്‍ഷങ്ങള്‍ക്ക് മുമ്പ് ചെറുംപാടം തോടിന് കുറുകെ നിര്‍മിച്ച ഇടുങ്ങിയ പാലവും സമീപത്തെ വലിയ കയറ്റവും റോഡിലെ കൊടുംവളവുകളും ഇതുവഴിയുള്ള യാത്ര ദുരിതമാക്കുന്നു. മണ്ണാര്‍ക്കാട് നിന്ന് ചത്തെല്ലൂര്‍ ഭാഗത്തേക്ക് പോകുന്ന വാഹനങ്ങള്‍ക്കുള്ള എളുപ്പ വഴിയാണിത്. ദേശീയപാതയിലെ നാട്ടുകല്‍ അമ്പത്തിമൂന്നാം മൈലില്‍നിന്ന് കുന്നുംപുറം-കൂരിമുക്ക് വഴി ചത്തെല്ലൂരിലേക്ക് നിലവില്‍ കരിങ്കല്ലത്താണി വഴി പോകുന്നതിനേക്കാള്‍ നാല് കിലോമീറ്ററോളം ലാഭിക്കാനാവും. മാത്രമല്ല കരിങ്കല്ലത്താണി ചത്തെല്ലൂര്‍ റോഡ് ജങ്ഷനിലെ ഗതാഗതക്കുരുക്കിന് ചെറിയ തോതിലെങ്കിലും പരിഹാരവുമാകും. ചെറുംപാടം തോടിന് പുതിയ പാലം നിര്‍മിക്കുകയും റോഡിലെ കൊടുംവളവുകള്‍ നിവര്‍ത്തണമെന്നുമാണ് നാട്ടുകാരുടെ ആവശ്യം.