പാലക്കുഴി ജലവൈദ്യുതി പദ്ധതി : സ്വകാര്യ ഭൂമി ഏറ്റെടുക്കല്‍ നടപടി ആരംഭിച്ചു

വടക്കഞ്ചേരി: പാലക്കുഴി ജലവൈദ്യുത പദ്ധതി നിര്‍മാണത്തിനായി മൂന്ന് മാസത്തിനകം ടെന്‍ഡര്‍ ക്ഷണിച്ച് തുടങ്ങും. ഇതിന്‍െറ ഭാഗമായി സ്വകാര്യ ഭൂമി ഏറ്റെടുക്കുന്നതിന്‍െറ രജിസ്ട്രേഷന്‍ നടപടി ആരംഭിച്ചു. ജില്ലാ പഞ്ചായത്തിന്‍െറ ചെറുകിട ജലവൈദ്യുത കമ്പനിയുടെ പേരിലാണ് രജിസ്ട്രേഷന്‍ നടത്തുന്നത്. വടക്കഞ്ചേരി സബ് രജിസ്ട്രാര്‍ ഓഫിസില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്‍റ് അഡ്വ. കെ. ശാന്തകുമാരി ചെക്കുകള്‍ കൈമാറി. രണ്ടുപേര്‍ക്കാണ് തുക കൈമാറിയത്. മറ്റ് ഭൂമികളുടെ രജിസ്ട്രേഷന്‍ ജൂണ്‍ രണ്ടിന് ശേഷം നടക്കും. പദ്ധതിയുടെ ചീഫ് എന്‍ജിനീയര്‍ ഇ.സി. പത്മരാജന്‍, ജില്ലാ പഞ്ചായത്ത് അംഗം എ.ടി. ഒൗസേപ്പ്, മുണ്ടൂര്‍ ഐ.ആര്‍.ടി.സി കണ്‍സല്‍ട്ടന്‍റ് രാധാഗോപി എന്നിവര്‍ പങ്കെടുത്തു. രജിസ്ട്രേഷന്‍ നടപടി പൂര്‍ത്തിയായാല്‍ പദ്ധതിയുടെ പ്രവര്‍ത്തനം തുടങ്ങുമെന്ന് അധികൃതര്‍ പറഞ്ഞു. ഏഴര ഏക്കര്‍ സ്ഥലമാണ് ഒമ്പത് പേരില്‍നിന്ന് ഏറ്റെടുക്കുന്നത്. 13 കോടി രൂപയാണ് പദ്ധതിയുടെ ചെലവ്. ഒരു വര്‍ഷം 3.78 ദശലക്ഷം യൂനിറ്റ് വൈദ്യുതിയാണ് ഉല്‍പാദിപ്പിക്കാന്‍ കഴിയുന്നത്. വനംവകുപ്പിന്‍െറ 0.3 ഹെക്ടര്‍ ഭൂമിയും ഇതിലുള്‍പ്പെടും.