നിയന്ത്രണംവിട്ട ബസ് പാലത്തിന്‍െറ കൈവരി തകര്‍ത്തു; വന്‍ ദുരന്തം ഒഴിവായി

മണ്ണാര്‍ക്കാട്: ഞെട്ടരക്കടവ് പാലത്തിന്‍െറ കൈവരികള്‍ നിയന്ത്രണംവിട്ട സ്വകാര്യ ബസ് ഇടിച്ചു തകര്‍ത്തു. തലനാരിഴക്ക് വന്‍ അപകടം ഒഴിവായി. ഇന്നലെ രാവിലെ പതിനൊന്നരയോടെയാണ് സംഭവം. മണ്ണാര്‍ക്കാട്ടുനിന്ന് കൂട്ടിലക്കടവിലേക്ക് പോവുകയായിരുന്ന താഴത്തെ കല്ലടി ഗാലക്സി ബസാണ് അപകടത്തില്‍പ്പെട്ടത്. ഇറക്കമിറങ്ങി വരുകയായിരുന്ന ബസിന്‍െറ ആക്സില്‍ തകര്‍ന്നതാണ് നിയന്ത്രണം വിടാന്‍ കാരണമെന്ന് പറയുന്നു. കൈവരികള്‍ തകര്‍ത്ത ബസിന്‍െറ ഒരു ചക്രം പുഴയിലേക്ക് തൂങ്ങിനിന്നു. വെള്ളിയാഴ്ചയായതിനാല്‍ യാത്രക്കാര്‍ കുറവായത് അപകടത്തിന്‍െറ വ്യാപ്തി കുറച്ചു. ഒരു വാഹനത്തിന് മാത്രം കടന്നുപോകാവുന്ന പാലത്തില്‍ ബസ് പുഴയിലേക്ക് തൂങ്ങി നിന്നതോടെ വൈകീട്ട് വരെ ഗതാഗതം തടസ്സപ്പെട്ടു.