ഭരണസമിതി യോഗം യു.ഡി.എഫ് അംഗങ്ങള്‍ ബഹിഷ്കരിച്ചു

പട്ടാമ്പി: കുലുക്കല്ലൂര്‍ ഗ്രാമപഞ്ചായത്ത് ഭരണസമിതി യോഗം യു.ഡി.എഫ് അംഗങ്ങള്‍ ബഹിഷ്കരിച്ചു. പ്രസിഡന്‍റായ കോണ്‍ഗ്രസിലെ മുഹമ്മദ് നൂറുദ്ദീനെതിരെ കോണ്‍ഗ്രസ് അംഗങ്ങള്‍ ഉള്‍പ്പെടെയുള്ള യു.ഡി.എഫിലെ ഒമ്പത് പേര്‍ അവിശ്വാസ പ്രമേയ നോട്ടീസ് നല്‍കിയ പശ്ചാത്തലത്തിലാണ് ബഹിഷ്കരണം. സംഭവത്തില്‍ പ്രതിഷേധിച്ച് പ്രതിപക്ഷ പാര്‍ട്ടിയായ സി.പി.എമ്മിലെ അംഗങ്ങള്‍ കുത്തിയിരിപ്പ് സമരം നടത്തി. പഞ്ചായത്തില്‍ ഭരണ സ്തംഭനമെന്ന് പ്രതിപക്ഷം കുറ്റപ്പെടുത്തി. അധികാര വടംവലി മൂലം വികസനപ്രവര്‍ത്തനങ്ങള്‍ നടത്താനോ പദ്ധതിനിര്‍വഹണം നടത്താനോ ഭരണസമിതിക്ക് കഴിഞ്ഞില്ളെന്നും ഗ്രാമസഭകള്‍ ചേര്‍ന്നിട്ടില്ളെന്നും അവര്‍ പറഞ്ഞു. പാര്‍ട്ടിയുടെയും മുന്നണിയുടെയും തീരുമാനങ്ങള്‍ ലംഘിക്കുന്നതായി ആരോപിച്ചാണ് യു.ഡി.എഫ് സ്വന്തം നേതാവിനെതിരെ അവിശ്വാസപ്രമേയ നോട്ടീസ് സമര്‍പ്പിച്ചത്. പാര്‍ട്ടിയിലെയും മുന്നണിയിലെയും അംഗങ്ങളുടെ കൂട്ടുത്തരവാദിത്വമില്ലായ്മയാണ് ഇപ്പോഴത്തെ പ്രതിസന്ധിക്ക് കാരണമെന്ന് പഞ്ചായത്ത് പ്രസിഡന്‍റ് മുഹമ്മദ് നൂറുദ്ദീന്‍ പറഞ്ഞു.