മലമ്പുഴ ഡാമിലെ ജലനിരപ്പ് കുറഞ്ഞു; കൃഷിയാവശ്യത്തിന് വെള്ളം ഈ മാസം മാത്രം

പാലക്കാട്: മലമ്പുഴ ഡാമിലെ ജലനിരപ്പ് മുന്‍ വര്‍ഷത്തേക്കാള്‍ താഴ്ന്നനിലയിലായി. ഡാമിലെ ജലനിരപ്പ് ഇപ്പോള്‍ 107.43 മീറ്ററാണ്. കഴിഞ്ഞ വര്‍ഷം ഇതേകാലയളവില്‍ 109.82 മീറ്റര്‍ ജലനിരപ്പുണ്ടായിരുന്നു. ഇത്തവണ മഴ കുറഞ്ഞതിനാല്‍ ഡാമില്‍ വെള്ളം കുറവാണ്. 115.45 മീറ്ററാണ് ഡാമിന്‍െറ പരമാവധി ജല സംഭരണ ശേഷി. കഴിഞ്ഞ വര്‍ഷം മഴക്കാലത്ത് പരിധി കവിഞ്ഞതിനെ തുടര്‍ന്ന് പല തവണ വെള്ളം തുറന്നുവിട്ടിരുന്നു. ഇത്തവണ ഇതുവരെയായി 112 മീറ്റര്‍ വെള്ളമാണ് ലഭിച്ചിട്ടുള്ളത്. ജലത്തിന്‍െറ അളവ് കുറഞ്ഞത് കുടിവെള്ള വിതരണവും കൃഷി വെള്ള വിതരണവും അവതാളത്തിലാവാനുള്ള സാധ്യതയേറെയാണ്. ജനുവരി 30 വരെ മാത്രമേ കൃഷിക്കുള്ള വെള്ളം തുറന്നു വിടുകയുള്ളുവെന്ന് ജലസേചന വകുപ്പ് അധികൃതര്‍ വ്യക്തമാക്കി. കഴിഞ്ഞ വര്‍ഷത്തേക്കാള്‍ മഴ കുറഞ്ഞതാണ് ഡാമില്‍ വെള്ളം കുറയാന്‍ കാരണം. അതേസമയം, ജലവിതാനം കുറയുന്നത് കുടിവെള്ള വിതരണത്തെ ബാധിക്കില്ളെന്നാണ് അറിയുന്നത്. ഡാമില്‍ 90 മീറ്റര്‍ വരെ ജലമുണ്ടെങ്കില്‍ മൂന്ന് മാസത്തേക്ക് കുടിവെള്ള വിതരണം മുടങ്ങാതെ നടത്താന്‍ കഴിയുമെന്ന് അധികൃതര്‍ വ്യക്താക്കി.