ഗഹാന്‍ രജിസ്ട്രേഷന്‍: സഹകരണ സ്ഥാപനങ്ങളിലെ വായ്പക്കാര്‍ ദുരിതത്തില്‍

ശ്രീകൃഷ്ണപുരം: ഗഹാന്‍ രജിസ്ട്രേഷന്‍ തകരാറിലായത് വായ്പക്കാരെ ദുരിതത്തിലാക്കി. ഗഹാന്‍ രജിസ്ട്രേഷന്‍ ഓണ്‍ലൈന്‍ സംവിധാനത്തിലേക്ക് മാറ്റിയതാണ് പ്രതിസന്ധിയുണ്ടാക്കിയത്. രജിസ്ട്രേഷന്‍ വകുപ്പ് ഓണ്‍ലൈന്‍ വഴിയാണ് ഇപ്പോള്‍ രജിസ്ട്രേഷനുകള്‍ നടത്തുന്നത്. വായ്പ എടുക്കുന്നവരും സഹകരണ സ്ഥാപനങ്ങളും തമ്മിലുള്ള പണയാധാര രജിസ്ട്രേഷനാണ് ഗഹാന്‍ രജിസ്ട്രേഷന്‍. പണയാധാര രജിസ്ട്രേഷന്‍ ഓണ്‍ലൈന്‍ വഴിയാണ് നടത്തുന്നത്. എന്നാല്‍, സാങ്കേതിക തകരാറുകളും സെര്‍വറിലെ പ്രശ്നങ്ങളും രജിസ്ട്രേഷനെ കാര്യമായി ബാധിക്കുന്നു. ഇതുമൂലം ഗഹാന്‍ രജിസ്ട്രേഷനും കുടിക്കട സര്‍ട്ടിഫിക്കറ്റുകളും ലഭിക്കാന്‍ ഏറെ കാലതാമസമെടുക്കുന്നു. സര്‍ട്ടിഫിക്കറ്റുകള്‍ യഥാസമയം ഹാജരാവാന്‍ സാധിക്കാത്തതിനാല്‍ വായ്പയും ലഭിക്കുന്നില്ല. കല്യാണ ആവശ്യങ്ങള്‍ക്കും മറ്റുമാണ് പെട്ടെന്ന് കിട്ടുമെന്നതിനാല്‍ മിക്കവരും വായ്പക്കായി സഹകരണ സ്ഥാപനങ്ങളെ ആശ്രയിക്കുന്നത്. ഗഹാന്‍ രജിസ്ട്രേഷന്‍ ഓണ്‍ലൈന്‍ ആക്കിയതോടെ പാവങ്ങളുടെ വായ്പ പ്രതീക്ഷയും അസ്തമിച്ചു. ഓണ്‍ ലൈന്‍ സംവിധാനത്തിലെ സാങ്കേതിക തകരാറുകള്‍ പരിഹരിച്ച് രജിസ്ട്രേഷന്‍ സുഗമമാക്കണമെന്ന് സഹകരണ സ്ഥാപനങ്ങള്‍ ആവശ്യപ്പെട്ടു.