ഇങ്ങനെയും ഒരെഴുത്തോ!

പട്ടാമ്പി: കഴുത്ത്, ചെവി, വായ, മൂക്ക്, കാലുകള്‍ തുടങ്ങി ശരീരത്തിന്‍െറ 20ല്‍പരം ഭാഗങ്ങള്‍കൊണ്ട് ഒറ്റക്കും വിവിധ ഭാഗങ്ങള്‍കൊണ്ട് ഒരുമിച്ചും തിരിച്ചും മറിച്ചും തലകീഴായും എഴുതി അദ്ഭുതം തീര്‍ക്കുകയാണ് കോഴിക്കോട് മുക്കം പഞ്ചായത്തിലെ അബ്ദുല്ല പുല്‍പറമ്പ്. മലയാളം, തമിഴ്, ഹിന്ദി, ഉര്‍ദു, ഇംഗ്ളീഷ്, കന്നട, തെലുങ്ക്, അറബി ഭാഷകളിലാണ് പകരംവെക്കാനില്ലാത്ത അക്ഷര വിസ്മയം. രണ്ടുഭാഷകള്‍ ഒരേസമയത്തും എഴുതും. പുറംതിരിഞ്ഞുള്ള എഴുത്തും വേറിട്ട കാഴ്ചതന്നെ. ഊഞ്ഞാലാടിയും നീന്തിയും ബൈക്കോടിച്ചും കാല്‍കൊണ്ട് ഓട്ടോ ഓടിച്ചും ഈ ഓട്ടോ ഡ്രൈവറുടെ കൗതുകങ്ങളില്‍ ചിലത് മാത്രം. സംസ്ഥാനത്തിനകത്തും പുറത്തുമായി ഇതിനകം 2000ത്തിലധികം വേദികളില്‍ പരിപാടി അവതരിപ്പിച്ചു. ‘ചിരിക്കാത്ത മനുഷ്യന്‍’ വെള്ളത്തിന് മുകളില്‍ ദീര്‍ഘനേരം നിവര്‍ന്ന് കിടക്കല്‍ തുടങ്ങിയ പരിപാടിയും അവതരിപ്പിക്കുന്നു. ലഹരി ബോധവത്കരണ ഭാഗമായി ഫോട്ടോ പ്രദര്‍ശനവും നടത്തി. വെള്ളിയാങ്കല്ല് അഗ്രകള്‍ചര്‍ എക്സ്പോയില്‍ ഏപ്രില്‍ 16 വരെ പരിപാടികള്‍ അവതരിപ്പിക്കാനത്തെിയതാണ് ഇദ്ദേഹം.