കണ്ണമ്പരിയാരം പി.കെ.എന്‍.എം.ജെ.ബി സ്കൂള്‍ മുറ്റത്ത് നൂറുമേനി പച്ചക്കറി

പത്തിരിപ്പാല: സ്കൂള്‍ മുറ്റത്തെ പത്ത് സെന്‍റ് ഭൂമിയില്‍ നടത്തിയ പച്ചക്കറി കൃഷിയില്‍ വിളഞ്ഞത് നൂറുമേനി. മങ്കര കണ്ണമ്പരിയാരം പി.കെ.എന്‍.എം.ജെ.ബി സ്കൂളിലെ ഹരിത ക്ളബിലെ നാലാം ക്ളാസ് വിദ്യാര്‍ഥികളുടെ കൂട്ടായ്മയിലാണ് ഒന്നര മാസം മുമ്പ് പച്ചക്കറി കൃഷി ഇറക്കിയത്. വെണ്ട, പയര്‍, വഴുതിന, മത്തന്‍ എന്നിവയാണ് ജൈവവളം മാത്രം ഉപയോഗിച്ച് കൃഷി ചെയ്തത്. ആവശ്യമായ വിത്തുകള്‍ മങ്കര കൃഷിഭവനില്‍നിന്ന് നല്‍കി. കൃഷി ഓഫിസര്‍ റഷീദ ബീഗത്തിന്‍െറ പ്രോത്സാഹനവും വിദ്യാര്‍ഥികളുടെ കൂട്ടായ്മയും കൂടിയായപ്പോള്‍ വിളവ് സമൃദ്ധമായി. ദിവസവും വിളവെടുക്കുന്ന പച്ചക്കറികള്‍ ഉച്ച ഭക്ഷണത്തിനായി ഉപയോഗിക്കാനാണ് പരിപാടി. കഴിഞ്ഞ ദിവസം പച്ചക്കറി വിളവെടുപ്പ് നടന്നു.