ടാങ്കര്‍ ലോറി സ്കൂട്ടറിലിടിച്ച് ട്രാന്‍സ്ഫോര്‍മര്‍ തകര്‍ത്തു

ഷൊര്‍ണൂര്‍: ടാങ്കര്‍ ലോറി സ്കൂട്ടറിലിടിച്ച് ട്രാന്‍സ്ഫോര്‍റമര്‍ തകര്‍ത്തു. യുവതി പരിക്കുകളോടെ അദ്ഭുതകരമായി രക്ഷപ്പെട്ടു.വൈദ്യുതി പ്രവഹിച്ച് ലോറിക്ക് തീപിടിക്കാതിരുന്നത് വന്‍ അപകടമൊഴിവാക്കി. കുളപ്പുള്ളി കല്ലിപ്പാടം ഷൈജു വില്ലയില്‍ ജിഷിയാണ് (30) പരിക്കുകളോടെ വാണിയംകുളത്തെ സ്വകാര്യ ആശുപത്രിയില്‍ ചികിത്സയിലുള്ളത്. ഷൊര്‍ണൂരിനും കുളപ്പുള്ളിക്കുമിടയില്‍ വ്യാഴാഴ്ച ഉച്ചക്ക് 1.50നായിരുന്നു അപകടം. ഷൊര്‍ണൂര്‍ ഭാഗത്തുനിന്ന് വരികയായിരുന്ന ടാങ്കര്‍ ലോറിക്ക് മുമ്പില്‍ യുവതി സ്കൂട്ടര്‍ ഓടിച്ചുപോവുകയായിരുന്നു. ഫയര്‍ സ്റ്റേഷന് സമീപംവെച്ച് യുവതി വലത്തോട്ടുള്ള റോഡിലേക്ക് സ്കൂട്ടര്‍ തിരിച്ചു. ഈ സമയം ലോറി സ്കൂട്ടറില്‍ ഇടിക്കുകയായിരുന്നു. സ്കൂട്ടറും യുവതിയും ലോറിക്കടിയില്‍ പെട്ടെങ്കിലും അദ്ഭുതകരമായി രക്ഷപ്പെട്ടു. ഇന്ധനം നിറച്ചുള്ള ലോറി തൊട്ടടുത്ത വൈദ്യുതി ട്രാന്‍സ്ഫോര്‍മറില്‍ ഇടിച്ചാണ് നിന്നത്. ഷൊര്‍ണൂര്‍ ഗവ. ടെക്നിക്കല്‍ സ്കൂളും വൊക്കേഷനല്‍ ഹയര്‍സെക്കന്‍ഡറി സ്കൂളും ഇവിടെയാണുള്ളത്. തൊട്ടുള്ള ഫയര്‍സ്റ്റേഷനില്‍നിന്ന് ഉടനെയത്തെിയ അഗ്നിശമന സേനക്കാര്‍ ആംബുലന്‍സില്‍ യുവതിയെ ആശുപത്രിയിലത്തെിച്ചു.