ജില്ലയില്‍ നെല്ല് സംഭരണം അവതാളത്തില്‍

പാലക്കാട്: സ്വകാര്യമില്ലുകളുമായുള്ള ചര്‍ച്ച പരാജയപ്പെട്ടതോടെ ഒക്ടോബര്‍ ഒന്നു മുതല്‍ ആരംഭിക്കുമെന്ന് സര്‍ക്കാര്‍ പ്രഖ്യാപിച്ച നെല്ല് സംഭരണം അവതാളത്തിലായി. ജില്ലയില്‍ വ്യാഴാഴ്ച പാഡികോയുടെ എലപ്പുള്ളിയിലെ മില്ലിലേക്ക് മാത്രമാണ് സംഭരണമുണ്ടായത്. സപൈ്ളകോയുടെ നേതൃത്വത്തില്‍ പാലക്കാട്, ആലത്തൂര്‍, ചിറ്റൂര്‍ താലൂക്കുകളില്‍നിന്നായി 50 ടണ്‍ നെല്ലാണ് സംഭരിച്ചത്. എലപ്പുള്ളിയുടെ പാഡികോ മില്ല് മാത്രമാണ് സംഭരണവുമായി സഹകരിക്കുന്നത്. സ്വകാര്യമില്ലുകളുടെ ആവശ്യം സര്‍ക്കാര്‍ അംഗീകരിക്കാത്തതിനാല്‍ ജില്ലയിലെ 11 സ്വകാര്യ മില്ലുകള്‍ സംഭരണത്തില്‍നിന്ന് വിട്ടുനില്‍ക്കുകയാണ്. കൈകാര്യച്ചെലവ് വര്‍ധിപ്പിക്കണമെന്നാണ് സ്വകാര്യ മില്ലുടമകളുടെ ആവശ്യം. ഒരു കിലോ നെല്ലിന് കൈകാര്യച്ചെലവിനത്തില്‍ 1.39 രൂപയാണ് സര്‍ക്കാര്‍ നല്‍കുന്നത്. ഇത് രണ്ടര രൂപയാക്കണമെന്നാണ് മില്ലുടമകളുടെ ആവശ്യം. 1.80 രൂപ നല്‍കാന്‍ 30ലെ ചര്‍ച്ചയില്‍ സര്‍ക്കാര്‍ തയാറായെങ്കിലും മില്ലുടമകള്‍ വഴങ്ങിയിട്ടില്ല. ജില്ലയില്‍ 35,068 കര്‍ഷകരാണ് ഒന്നാംവിള നെല്ലു സംഭരണത്തിന് രജിസ്റ്റര്‍ ചെയ്തത്. ഒന്നാംവിളക്ക് 21.50 രൂപ നിരക്കിലാണ് സപൈ്ളകോ നെല്ളെടുക്കുന്നത്. കൊയ്ത്ത് ആരംഭിച്ച മേഖലക്ക് മുന്‍ഗണന നല്‍കി സംഭരണം നടത്താന്‍ സപൈ്ളകോ പദ്ധതി തയാറാക്കിയെങ്കിലും മില്ലുടമകളുടെ നിസ്സഹകരണം സംഭരണം താറുമാറാക്കി. ഇതിനിടെ തുലാവര്‍ഷം ആരംഭിച്ചതും കര്‍ഷകര്‍ക്ക് ഇരുട്ടടിയായി. കൊയ്യാറായ പാടങ്ങളില്‍ വെള്ളം കയറിയതാണ് കൊയ്ത്തിന് തടസ്സമായത്. സംഭരണം സംബന്ധിച്ച് അനിശ്ചിതത്വം തുടര്‍ന്നാല്‍ ഒന്നാംവിള കര്‍ഷര്‍ക്ക് കനത്ത നഷ്ടംവരുത്തിവെക്കും. വ്യാഴാഴ്ച പാഡികോ മില്ലിലേക്ക് തുടങ്ങിയ സംഭരണം എലപ്പുള്ളി കുണ്ടുകാട് കെ.വി. വിജയദാസ് എം.എല്‍.എ ഉദ്ഘാടനം ചെയ്തു