ഒറ്റപ്പാലം റെയില്‍വേ സ്റ്റേഷന് പുതിയ കെട്ടിടം പരിഗണനയില്‍

ഒറ്റപ്പാലം: ആദര്‍ശ് സ്റ്റേഷനുകളുടെ പട്ടികയില്‍ ഉള്‍പ്പെട്ട ഒറ്റപ്പാലം റെയില്‍വേ സ്റ്റേഷന് പുതിയ കെട്ടിട നിര്‍മാണം പരിഗണനയിലുണ്ടെന്ന് സതേണ്‍ റെയില്‍വേ മാനേജര്‍ വസിഷ്ഠ ജോഹ്രി. വാര്‍ഷിക പരിശോധനയുടെ ഭാഗമായി ഒറ്റപ്പാലം സ്റ്റേഷനില്‍ എത്തിയതായിരുന്നു അദ്ദേഹം. നിലവിലുള്ള കെട്ടിടത്തിന്‍െറ കാലപ്പഴക്കം കണക്കിലെടുത്താണ് നടപടി. എം.പി ഫണ്ട് വിനിയോഗിച്ച് പ്ളാറ്റ്ഫോമിന്‍െറ മേല്‍ക്കൂര നിര്‍മാണം പൂര്‍ത്തിയാക്കുന്നതും ആലോചിക്കും. ബോഗികള്‍ നില്‍ക്കുന്നതിന്‍െറ വിവരം യാത്രക്കാര്‍ക്ക് അറിയുന്നതിന് ബോര്‍ഡുകള്‍ പ്ളാറ്റ് ഫോമില്‍ സ്ഥാപിക്കും. ആദര്‍ശ് സ്റ്റേഷന് വേണ്ട ഭൗതിക സാഹചര്യം ഒറ്റപ്പാലത്ത് ഉണ്ടെന്നും അദ്ദേഹം പറഞ്ഞു. വെള്ളിയാഴ്ച രാവിലെ 11ഓടെ സ്റ്റേഷനിലത്തെിയ ഇദ്ദേഹം ഉദ്യോഗസ്ഥര്‍ക്കൊപ്പം സ്റ്റേഷനും പരിസരവും പരിശോധിച്ചു. ഡിവിഷനല്‍ മാനേജര്‍ ആനന്ദ് പ്രകാശ്, എസ്. സുബ്രഹ്മണ്യന്‍, ബി. നരസിംഹ റാവു, ഡി.ആര്‍.ഒ ഗോപിനാഥ് തുടങ്ങിയവര്‍ അദ്ദേഹത്തോടൊപ്പമുണ്ടായിരുന്നു.