സിനിമാ സ്റ്റൈലില്‍ പിന്തുടര്‍ന്ന് പൊലീസ് 16,500 പാക്കറ്റ് ഹാന്‍സ് പിടികൂടി

വടക്കഞ്ചേരി: സിനിമാ സ്റ്റൈലില്‍ പിന്തുടര്‍ന്ന് വാഹനത്തില്‍നിന്ന് പൊലീസ് 11 ചാക്ക് നിരോധിത പുകയില ഉല്‍പന്നം പിടികൂടി. 16,500 പാക്കറ്റുകളാണുണ്ടായിരുന്നത്. ഇപ്പോഴത്തെ വില മൂന്ന് ലക്ഷത്തിലധികം രൂപ വരുമെന്ന് കണക്കാക്കപ്പെടുന്നു. തിങ്കളാഴ്ച രാത്രിയാണ് വടക്കഞ്ചേരി കമ്മാന്തറയില്‍ വെച്ച് പൊലീസ് ലഹരി വസ്തു പിടികൂടിയത്. ബൊലേറോ ജീപ്പും 11 ചാക്ക് ഹാന്‍സും പൊലീസ് കസ്റ്റഡിയിലെടുത്തു. വാഹനം ഓടിച്ച ഡ്രൈവറും ഒപ്പം ഉണ്ടായിരുന്ന മറ്റൊരാളും വാഹനം ഉപേക്ഷിച്ച് ഓടി രക്ഷപ്പെട്ടു. തമിഴ്നാട് അതിര്‍ത്തി കടന്നുവരുന്ന വാഹനത്തില്‍ ഹാന്‍സ് കൊണ്ടുവരുന്ന വിവരം പൊലീസിന് രഹസ്യമായി ലഭിച്ചിരുന്നു. തുടര്‍ന്ന്, മീനാക്ഷിപുരം, തത്തമംഗലം, പുതുനഗരം, കുനിശ്ശേരി, ആലത്തൂര്‍, വടക്കഞ്ചേരി എന്നിവിടങ്ങളില്‍ പൊലീസ് പട്രോളിങ് നടത്തുന്നതിനിടെയാണ് ബൊലേറോ വാഹനം അമിത വേഗതയില്‍ എത്തിയത്. പൊലീസ് കൈ കാണിച്ചിട്ടും നിര്‍ത്താതെ പോയതിനെ തുടര്‍ന്ന് എല്ലാ പൊലീസ് സ്റ്റേഷനുകളിലും വിവരം നല്‍കി. ദേശീയപാതയില്‍ പൊലീസ് പിന്തുടര്‍ന്നുവെങ്കിലും രാത്രി 11ഓടെ വടക്കഞ്ചേരി കമ്മാന്തറയില്‍ എത്തിയപ്പോള്‍ റോഡ് പണി മൂലം പോകാന്‍ പറ്റാത്ത നിലയിലായപ്പോഴാണ് വാഹനം നിര്‍ത്തി ഡ്രൈവറും ഒപ്പം ഉണ്ടായിരുന്ന യാത്രക്കാരനും ഓടി രക്ഷപ്പെട്ടത്. അഡീഷനല്‍ എസ്.ഐ മോഹനന്‍, സീനിയര്‍ സിവില്‍ പൊലീസ് ഓഫിസര്‍ ഇസ്മായില്‍, സി.പി.ഒമാരായ സിബിന്‍, ഡ്രൈവര്‍ സാബു എന്നിവരാണ് പിന്തുടര്‍ന്ന് വാഹനം പിടികൂടിയത്.