മഞ്ചേരി മെഡിക്കൽ കോളജിലെ ലിഫ്റ്റ് തകരാറിൽ; ​േരാഗികൾ വലഞ്ഞു

മഞ്ചേരി: ഗവ. മെഡിക്കൽ കോളജിലെ അത്യാഹിത വിഭാഗത്തിന് മുന്നിൽ ലിഫ്റ്റ് തകരാറിലായതോടെ രോഗികൾ വലഞ്ഞു. ബുധനാഴ്ച രാവിലെയാണ് തകരാറിലായത്. രോഗികളെ വാർഡുകളിലേക്ക് മാറ്റാനാണ് ലിഫ്റ്റ് ഉപയോഗിക്കുന്നത്. മൂന്നും നാലും നിലയിൽ പ്രവർത്തിക്കുന്ന വാർഡുകളിലേക്ക് രോഗികളെ സ്ട്രെച്ചറിൽ ചുമന്നാണ് ബന്ധുക്കളും ആശുപത്രിയിലെ സന്നദ്ധ സംഘടന പ്രവർത്തകരും എത്തിച്ചത്. ഓപറേഷൻ തിയറ്ററിലേക്ക് രോഗികളെ എത്തിക്കാനും പ്രയാസം നേരിട്ടു. കഴിഞ്ഞ ദിവസങ്ങളിലെ ശക്തമായ മഴയിൽ ലിഫ്റ്റ് പ്രവർത്തിക്കുന്ന താഴ്ഭാഗത്ത് വെള്ളം കയറിയിരുന്നു. ജീവനക്കാർ ബക്കറ്റ് ഉപയോഗിച്ച് വെള്ളം ഒഴിവാക്കി വൃത്തിയാക്കുകയായിരുന്നു. ബന്ധപ്പെട്ട ജീവനക്കാരെത്തി ലിഫ്റ്റ് പ്രവർത്തിപ്പിക്കാനുള്ള ശ്രമം ആരംഭിച്ചു.