മൊബൈൽ ആപ്​ തകരാറിൽ; തൊഴിലുറപ്പ് പദ്ധതി അവതാളത്തിൽ

തൊഴിൽദിനങ്ങൾ സൃഷ്ടിക്കാനാവാതെ ഗ്രാമപഞ്ചായത്തുകൾ മണ്ണാർക്കാട്: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ 'ഭുവൻ' മൊബൈൽ ആപ് തകരാറിലായത് പദ്ധതി പ്രവർത്തനം താളം തെറ്റിക്കുന്നു. പദ്ധതിപ്രകാരം ഓരോ പ്രവൃത്തി തുടങ്ങും മുമ്പും പണി നടക്കുമ്പോഴും പൂർത്തിയാവുമ്പോഴും അതി​െൻറ ഫോട്ടോകൾ വെബ്സൈറ്റിൽ അപ്ലോഡ് ചെയ്യണം. എന്നാൽ, മൊബൈൽ ആപ് പ്രവർത്തിക്കാത്തതിനാൽ ഇത് യഥാസമയം ചെയ്യാനാവുന്നില്ല. ഇതോടെ ഓരോ മാസവും ഗ്രാമപഞ്ചായത്തുകൾക്ക് നൽകിയ തൊഴിൽദിനങ്ങൾ പൂർത്തീകരിക്കാനാവാത്ത സ്ഥിതിയാണ്. പ്രവൃത്തി തുടങ്ങുന്നതിന് മുമ്പുള്ള ഫോട്ടോ അപ്ലോഡ് ചെയ്താലേ പണിയെടുക്കാനുള്ള മസ്റ്റർ റോൾ ലഭിക്കൂ. ഒരു മാസത്തിനിടെ നാലുതവണ മൊബൈൽ ആപ് അപ്ഡേഷൻ നടത്തിയെങ്കിലും ഫീൽഡ് തലത്തിൽ പ്രവർത്തനസജ്ജമായിട്ടില്ല. ഒരു കുടുംബത്തിന് 100 തൊഴിൽദിനങ്ങളാണ് നൽകേണ്ടത്. വെബ്സൈറ്റും മൊബൈൽ ആപ്പും പ്രവർത്തനസജ്ജമായാലേ പദ്ധതി പ്രവൃത്തികൾ നടത്താനാവൂ.