സ്വകാര്യ ബസുകളുടെ നാളത്തെ ഒാട്ടം ദുരിതബാധിതർക്കുവേണ്ടി

മലപ്പുറം: പ്രളയ ബാധിതരെ സഹായിക്കാൻ ജില്ലയിലെ സ്വകാര്യ ബസുകൾ തിങ്കളാഴ്ച കാരുണ്യയാത്ര നടത്തുമെന്ന് ജില്ല പ്രൈവറ്റ് ബസ് ഒാപറേറ്റേഴ്സ് അസോസിയേഷൻ ഭാരവാഹികൾ വാർത്തസമ്മേളനത്തിൽ അറിയിച്ചു. അന്ന് യാത്ര ചെയ്യുന്നവർ ടിക്കറ്റ് എടുക്കേണ്ടതില്ല. പകരം ജീവനക്കാരുടെ കൈകളിലുള്ള ബക്കറ്റിലേക്ക് സംഭാവന നൽകിയാൽ മതി. ബസുകളിൽനിന്ന് ലഭിക്കുന്ന തുകയിൽനിന്ന് ഡീസൽ ചെലവ് കഴിച്ച് ബാക്കിവരുന്ന തുക മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകും. തിങ്കളാഴ്ച വിദ്യാർഥികൾ കൺസെഷൻ ഒഴിവാക്കി ഫണ്ട് സമാഹരണത്തിൽ പങ്കാളികളാവണമെന്ന് ഭാരവാഹികൾ അഭ‍്യർഥിച്ചു. ഞായറാഴ്ച രാവിലെ 11ന് കലക്ടറേറ്റ് പരിസരത്ത് ജില്ല കലക്ടർ അമിത് മീണ ഉദ്ഘാടനം ചെയ്യും. വാർത്തസമ്മേളനത്തിൽ പ്രസിഡൻറ് നാണി ഹാജി, ഹംസ എരിക്കുന്നൻ, കെ.പി. അബ്ദുറഹിമാൻ, കെ. മുഹമ്മദാലി ഹാജി, റഫീഖ് കുരിക്കൾ എന്നിവർ പെങ്കടുത്തു.