ജീവിച്ചിരിക്കുന്ന ഖദീജ മരിച്ചെന്ന് മൂർക്കനാട് പെൻഷൻ പട്ടികയിൽ പിശക് വ്യാപകം

കൊളത്തൂർ: രണ്ട് പെൺമക്കളുമായി െകാളത്തൂർ അമ്പലപ്പടിയിൽ താമസിക്കുന്ന വ്യക്തി മരിച്ചതായാണ് മൂർക്കനാട് പഞ്ചായത്തിലെ പെൻഷനുവേണ്ടി തയാറാക്കിയവരുടെ പട്ടികയിൽ ഉള്ളത്. കൊളത്തൂർ അമ്പലപ്പടിയിലെ പരേതനായ ചേക്കുട്ടിയുടെ ഭാര്യ ഖദീജയെയാണ് അധികൃതർ പരേതയാക്കിയത്. ജന്മന ശാരീരിക വെല്ലുവിളി നേരിടുന്ന പറപള്ളത്ത് അബ്ദുൽ ഖാദറിന് പെൻഷന് അർഹതയില്ലെന്നാണ് അധികൃതരുടെ കണ്ടെത്തൽ. ഇക്കാലമത്രയും വികലാംഗ പെൻഷൻ വാങ്ങിയ അബ്ദുൽ ഖാദറിന് ആദ്യമായാണ് പെൻഷൻ മുടങ്ങുന്നത്. സൈക്കിൾ പോലും സ്വന്തമായി ഇല്ലാത്ത ഇയാൾക്ക് നാലു ചക്രവാഹനം ഉണ്ടെന്നാണ് രേഖയിലുള്ളത്. പെൻഷന് അർഹരായവരുടെ പട്ടികയിൽ നിരവധി പിശകുകൾ ഉള്ളതായാണ് ആരോപണം. പട്ടിക റദ്ദാക്കി തെറ്റുകൾ തിരുത്തിയ പുതിയ പട്ടിക പ്രസിദ്ധീകരിക്കണമെന്നാണ് ആവശ്യം.