കരിപ്പൂരിൽ 24 ലക്ഷത്തി​െൻറ സ്വർണം പിടികൂടി

കൊണ്ടോട്ടി: കരിപ്പൂർ വിമാനത്താവളം വഴി മിശ്രിത രൂപത്തിൽ കടത്താൻ ശ്രമിച്ച 24.89 ലക്ഷം രൂപയുടെ സ്വർണം പിടികൂടി. ശനിയാഴ്ച ദുബൈയിൽ നിന്നുള്ള എയർ ഇന്ത്യ എക്സ്പ്രസിലെത്തിയ രണ്ട് യാത്രക്കാരിൽ നിന്നാണ് എയർ കസ്റ്റംസ് ഇൻറലിജൻസ് 787 ഗ്രാം സ്വർണം പിടികൂടിയത്. വയനാട് തരുവണ സ്വദേശികളായ മുഹമ്മദ് കുന്നുമ്പുറത്ത് (30), ഖാലിദ് (36) എന്നിവരിൽ നിന്നാണ് സ്വർണം കണ്ടെടുത്തത്. മുഹമ്മദിൽ നിന്ന് 706 ഗ്രാമും ഖാലിദിൽനിന്ന് 713 ഗ്രാം മിശ്രിതവുമാണ് സംശയത്തെ തുടർന്ന് നടത്തിയ പരിശോധനയിൽ പിടികൂടിയത്. ഇവയിൽ നിന്ന് പിന്നീട് സ്വർണം വേർതിരിച്ചെടുക്കുകയായിരുന്നു. മുഹമ്മദിൽ നിന്ന് 12.20 ലക്ഷം രൂപ വില വരുന്ന 386 ഗ്രാമും ഖാലിദിൽ നിന്ന് 12.68 ലക്ഷം രൂപ വില വരുന്ന 401 ഗ്രാം സ്വർണവുമാണ് കസ്റ്റംസ് പിടികൂടിയത്.