മാലിന‍്യം തള്ളൽ: നഗരത്തിൽ സി.സി.ടി.വി കാമറ സ്ഥാപിക്കും

നിലമ്പൂർ: നഗരസഭയിലെ പ്രധാന നിരത്തുകളിൽ കക്കൂസ് മാലിന‍്യം ഉൾപ്പെടെ തള്ളുന്ന സാഹചര‍്യത്തിൽ പ്രധാനയിടങ്ങളിൽ സി.സി.ടി.വി കാമറകൾ സ്ഥാപിക്കാൻ തീരുമാനം. വ‍്യാഴാഴ്ച ചേർന്ന നഗരസഭ ബോർഡ് യോഗത്തിലാണ് തീരുമാനം. വ‍്യാപാരികളുമായി സഹകരിച്ചാവും കാമറകൾ സ്ഥാപിക്കുക. ബസ്സ്റ്റാൻഡുകൾ, റെയിൽവേ സ്റ്റേഷൻ, മിനി ബൈപാസ് റോഡ്, പ്രധാന നിരത്തുകൾ, ചാലിയാർ, കരിമ്പുഴ എന്നിവയുടെ തീരങ്ങൾ ഇവിടങ്ങളിലാവും കാമറ കണ്ണുകൾ തുറക്കുക. അടുത്തിടെ നിലമ്പൂർ രാജീവ് ഗാന്ധി മിനി ബൈപാസ് റോഡിലും ചാലിയാറി‍​െൻറ തീരത്തും ചന്തക്കുന്ന് ബസ്സ്റ്റാൻഡിലും കക്കൂസ് മാലിന‍്യവും അറവുമാലിന്യവും തള്ളിയിരുന്നു. മാലിന‍്യം തള്ളുന്നവർക്കെതിരെ കർശന നിയമനടപടി സ്വീകരിക്കാനാണ് തീരുമാനം.