അപകടഭീതിയുയർത്തി ദേശീയപാതയോരത്തെ കുഴികൾ

കരിങ്കല്ലത്താണി: കോഴിക്കോട്-പാലക്കാട് ദേശീയപാതയിലെ കരിങ്കല്ലത്താണി ടൗണിൽ പെട്രോൾപമ്പിന് സമീപത്ത് വേനൽമഴയിലുണ്ടായ കുഴികൾ വാഹനയാത്രക്കാർക്ക് ഭീഷണിയാകുന്നു. ദിവസേന നിരവധി വാഹനങ്ങൾ സഞ്ചരിക്കുന്ന പാതയിൽ ഇരുചക്ര വാഹനങ്ങളുൾപ്പെടെ അപകടത്തിൽ പെടുന്നത് നിത്യസംഭമാണെന്ന് നാട്ടുകാർ പറഞ്ഞു. പാതയോട് ചേർന്നുള്ള മണ്ണ് മഴയിൽ ഒലിച്ചുപോയതാണ് കുഴികൾ രൂപപ്പെടാൻ കാരണം. വെള്ളം സമീപത്തെ തോട്ടിലേക്ക് ഒഴുക്കിവിടാൻ സംവിധാനമൊരുക്കിയാൽ പ്രശ്നത്തിന് ഏറെക്കുറെ പരിഹാരമാകും.