കല്ലാമൂലയിൽ ബസ് മറിഞ്ഞ്​ 17​ പേര്‍ക്ക് പരിക്ക്

കാളികാവ്: ചോക്കാട് കല്ലാമൂല പാലത്തിന് സമീപം സ്വകാര്യബസ് മറിഞ്ഞ് 17 പേര്‍ക്ക് പരിക്ക്. കാളികാവില്‍നിന്ന് നിലമ്പൂരിലേക്ക് പോവുകയായിരുന്ന യു.കെ.ബി ബസാണ് അപകടത്തില്‍പെട്ടത്. നിയന്ത്രണം വിട്ട്, റോഡരികില്‍ നിര്‍ത്തിയിട്ട ബൈക്കിന് മുകളിലൂടെയാണ് മറിഞ്ഞത്. ഞായറാഴ്ച ഉച്ചക്ക് 12ഒാടെയായിരുന്നു സംഭവം. കളപറമ്പില്‍ ഗ്രീഷ്മ (21), പള്ളിത്താനം ബിന്‍സി (21), വട്ടപറമ്പത്ത് കൃഷ്ണന്‍ (56), നടുക്കുടിയില്‍ സെല്‍വം (42), നടുക്കുടിയില്‍ വിഗ്‌നേഷ് (14), വെള്ളാമ്പറം കുമാരന്‍ (48), ചീനവിളയില്‍ ഐസക്ക് (69) എന്നിവരാണ് പരിക്കേറ്റ് നിലമ്പൂര്‍ ജില്ല ആശുപത്രിയിലുള്ളത്. ബസ് മറിഞ്ഞ സ്ഥലത്തുനിന്ന് പാലത്തിലേക്ക് ഏതാനും മീറ്റര്‍ മാത്രമാണ് ദൂരം. മറിഞ്ഞതിനുശേഷം നിരങ്ങിനീങ്ങിയ ബസ് വൈദ്യുതിപോസ്റ്റില്‍ ഇടിച്ചുനിന്നു. യാത്രക്കാര്‍ കുറവായതും വൈദ്യുതി ലൈന്‍ പൊട്ടി വീഴാത്തതിനാലും വലിയ അപകടം ഒഴിവായി. ബസി​െൻറ ഇരുഭാഗവും തകര്‍ന്നു. മുന്നിലെ വലതുഭാഗത്തെ ചക്രം ജാമായതാണ് അപകടകാരണമായി പറയുന്നത്. കല്ലാമൂല പാലത്തിന് സമീപം മറിഞ്ഞ സ്വകാര്യ ബസ്