വിവരാവകാശ പ്രവർത്തകനെ അക്രമിച്ചതിൽ പ്രതിഷേധം

തിരൂരങ്ങാടി: വിവരാവകാശ പ്രവർത്തകനും ആം ആദ്മി പ്രവർത്തകനുമായ തോട്ടത്തിൽ അബ്ദുൽ റഹീമിനെതിരെ നടന്ന വധശ്രമത്തിൽ ആം ആദ്മി പാർട്ടി പ്രതിഷേധിച്ചു. കഴിഞ്ഞ ദിവസം വൈകീട്ട് റഹീമി​െൻറ പരപ്പനങ്ങാടിയിലെ കടയിലെത്തിയാണ് രണ്ടംഗ സംഘം അക്രമിച്ചത്. കഴുത്തിൽ കത്തിവെച്ച്‌ ഭീഷണിപ്പെടുത്തുകയും തലക്കും കണ്ണിനും അടിച്ചതായും പറയുന്നു. പരിക്കേറ്റ റഹീം തിരൂരങ്ങാടി താലൂക്ക് ആശുപത്രിയിൽ ചികിൽസയിലാണ്. മൂന്നിയൂർ പഞ്ചായത്തിലെ റോഡ് നിർമാണത്തിലെ അഴിമതിക്കെതിരിൽ പ്രതികരിച്ചതിനെത്തുടർന്നാണ് ആക്രമണം ഉണ്ടായതെന്ന് ഭാരവാഹികൾ പറഞ്ഞു. പരാതി നൽകി ദിവസങ്ങളായിട്ടും പൊലീസ് അന്വേഷണത്തിനെത്തിയില്ലെന്നും ഇവർ ആരോപിച്ചു. പ്രതികളെ എത്രയും വേഗം നിയമത്തിന് മുന്നിലെത്തിക്കണമെന്നും ഭാരവാഹികളായ നൗഷാദ് പല്ലാരിമംഗലം, മുഹമ്മദ് നവാസ് പുളിക്കൽ, എം.വി. ശബീറലി എന്നിവർ വാർത്തസമ്മേളനത്തിൽ ആവശ്യപ്പെട്ടു.