പൈപ്പിലൂടെയെത്തിയത് മലിനജലം കലർന്ന കുടിവെള്ളം; ഉപഭോക്താക്കൾ വലഞ്ഞു

പെരിന്തൽമണ്ണ: ജല അതോറിറ്റി ശനിയാഴ്ച വൈകീട്ട് അങ്ങാടിപ്പുറം ഐ.എച്ച്.ആർ.ഡി ഗാന്ധിനഗർ ഭാഗത്തേക്ക് വിതരണം ചെയ്തത് മലിനജലം കലർന്ന കുടിവെള്ളം. പുഴയിൽനിന്ന് നേരിട്ട് ശുദ്ധീകരിക്കാതെ പമ്പിങ് നടത്തിയെന്ന് സംശയം തോന്നുന്ന വെള്ളമാണ് വീടുകളിലെത്തിയത്. കിണറുകളോ മറ്റു മാർഗങ്ങളോ ഇല്ലാതെ പൈപ്പ് വെള്ളം മാത്രം ആശ്രയിക്കുന്ന വീട്ടുകാരാണ് ഇതുമൂലം ഏറെ പ്രയാസത്തിലായത്. രണ്ട് ദിവസം കൂടുമ്പോഴാണ് വീടുകളിൽ വെള്ളമെത്തുന്നത്. ഉയർന്ന പ്രദേശങ്ങളിലേക്ക് വെള്ളമെത്തിയിട്ട് മാസങ്ങളോളമായി. വോൾട്ടേജില്ലാത്തതാണ് കാരണമെന്ന് പറയുന്നു.