കാടി‍െൻറ മക്കൾക്ക് ആറാംതവണയും നൂറിൽ നൂറ്​

നിലമ്പൂർ: ചോലനായ്ക്ക-കാട്ടുനായ്ക്ക വിഭാഗം കുട്ടികൾ താമസിച്ചുപഠിക്കുന്ന നിലമ്പൂർ വെളിയംതോടിലെ ഇന്ദിര ഗാന്ധി മെമ്മോറിയൽ മോഡൽ റസിഡൻഷ‍്യൽ സ്കൂളിന് തുടർച്ചയായി ആറാം തവണയും എസ്.എസ്.എൽ.സിക്ക് നൂറുശതമാനം വിജയം. പരീക്ഷക്കിരുന്ന 35 കുട്ടികളും പത്താംതരം കടന്നു. 19 ആൺകുട്ടികളും 16 പെൺകുട്ടികളുമാണ് പരീക്ഷയെഴുതിയത്. മികച്ച മാർക്കോടെയാണ് ചിലർ പാസായത്. അഞ്ച് എ പ്ലസ് നേടിയവരുമുണ്ട്. നിലമ്പൂർ ഉൾക്കാടുകളിലെ കോളനികളിൽ അധിവസിക്കുന്ന കുടുംബങ്ങളിലെ കുട്ടികളാണിവർ. ഒഴിവുസമയങ്ങളിൽ സ്പെഷ‍്യൽ ക്ലാസുകൾ നൽകിയാണ് തിളക്കമാർന്ന വിജയം നേടിയെടുത്തതെന്ന് പ്രധാനാധ‍്യാപിക ആർ. സൗദാമിനി പറഞ്ഞു.