പൊലീസിന്​ കിട്ടാത്ത കള്ളനെ പിടിച്ച്​ ആര്യ താരം

മങ്കട: റെയില്‍വേ സ്റ്റേഷനില്‍ നിന്ന് മോഷണം പോയ ബാഗ് കള്ളനില്‍ നിന്ന് തിരിച്ചുപിടിച്ച പന്ത്രണ്ടുകാരി ആര്യക്ക് സാമൂഹികമാധ്യമങ്ങളിൽ അഭിനന്ദനപ്രവാഹം. മലപ്പുറം ഹെഡ് പോസ്റ്റോഫിസ് ജീവനക്കാരന്‍ മങ്കട കടന്നമണ്ണ സ്വദേശി പൊന്നുവി​െൻറ മകള്‍ ആര്യയാണ് താരമായത്. കഴിഞ്ഞദിവസം കുടജാദ്രി യാത്ര കഴിഞ്ഞ് മടങ്ങുന്നതിനിടെയാണ് പൊന്നുവി​െൻറ െട്രയിന്‍ ടിക്കറ്റ് അടങ്ങിയ ബാഗ് മോഷണം പോയത്. മംഗലാപുരം റെയിൽവേ സ്‌റ്റേഷനിലായിരുന്നു സംഭവം. 2.20നുള്ള െട്രയിന്‍ കയറാനായി എത്തിയതായിരുന്നു ഇവർ. കൂടെയുണ്ടായിരുന്ന കുടുംബാംഗങ്ങള്‍ ഭക്ഷണം കഴിക്കാൻ പോയ സമയത്ത് മൊബൈൽ ഫോണില്‍ സംസാരിച്ച് നിൽക്കെ പൊന്നുവി​െൻറ ബാഗ് മോഷ്ടാവ് കവരുകയായിരുന്നു. റെയിൽവേ പൊലീസ് പരിശോധന നടത്തിയെങ്കിലും മോഷ്ടാവിനെ കണ്ടെത്തിയില്ല. ഇതിനുശേഷം അര മണിക്കൂര്‍ കഴിഞ്ഞാണ് ബാഗുമായി ചെന്നൈ മെയിലില്‍ കയറാന്‍ പോകുന്ന മോഷ്ടാവിനെ ആര്യ കണ്ടത്. ഉടൻ ഓടിച്ചെന്ന് ബാഗിൽ പിടിച്ചു. എന്നാല്‍, ത​െൻറ ബാഗാണെന്ന് പറഞ്ഞ് തുറന്നുകാട്ടിയ മോഷ്ടാവ് ത​െൻറ പാൻറ്സും ഷര്‍ട്ടും എടുത്തുകാണിച്ചെങ്കിലും അവൾ വിട്ടില്ല. മറ്റൊരു അറ തുറന്നപ്പോള്‍ ആര്യയുടെ മേക്കപ് ബോക്‌സ് കണ്ടെത്തി. പൊലീസ് ചോദ്യം ചെയ്തതോടെ ഇയാള്‍ കുറ്റം സമ്മതിക്കുകയും ഉപേക്ഷിച്ച സാധനങ്ങള്‍ കണ്ടെത്തുകയും ചെയ്തു. മങ്കട ഗവ. ഹൈസ്‌കൂളിലെ ആറാം ക്ലാസ് വിദ്യാര്‍ഥിനിയാണ് ആര്യ.