യു.പിയിൽ ഉറങ്ങിക്കിടന്ന നായുടെ മുകളിൽ റോഡ്​ നിർമിച്ച്​ മഹാക്രൂരത

ആഗ്ര: ഒാരംചേർന്നു കിടക്കുന്ന നായുടെ ശരീര ഭാഗത്തിനു മുകളിലൂടെ ഉത്തർപ്രദേശ് പൊതുമരാമത്ത് വകുപ്പ് റോഡ് നിർമിച്ചു. റോഡിനടിയിൽ പെട്ടുപോയ ശരീരഭാഗം അനക്കാനാവാതെ നായ് കിടന്നത് മണിക്കൂറുകളോളം. നായുടെ പിൻകാലുകൾ പൂർണമായും റോഡിനടിയിലായി. ചുട്ടുപൊള്ളുന്ന ടാർ നായുടെ ദേഹത്ത് ചൊരിഞ്ഞുകൊണ്ടാണ് റോഡ് നിർമാണം തകൃതിയായി നടന്നത്. ആഗ്രയിലെ ഫത്ഹേബാദിൽ ചൊവ്വാഴ്ച രാത്രിയാണ് മനുഷ്യ മനഃസാക്ഷിയെ മരവിപ്പിക്കുന്ന ക്രൂരത അരങ്ങേറിയത്. റോഡ് ടാറിങ് നടക്കുമ്പോൾ നായ്ക്ക് ജീവനുണ്ടായിരുന്നെന്നും നായ് വേദനകൊണ്ട് ഉറക്കെ ഒാരിയിട്ടിട്ടും നിർമാണ തൊഴിലാളികൾ അവഗണിച്ച് ജോലി തുടരുകയായിരുന്നെന്നും സമീപത്തെ വീട്ടുകാർ പറഞ്ഞു. എന്നാൽ, പ്രവൃത്തി നടന്നത് രാത്രിയായിരുന്നതിനാൽ തൊഴിലാളികൾ നായയെ കണ്ടില്ലെന്നും റിപ്പോർട്ടുണ്ട്. നായുടെ കാലുകൾ റോഡിനടിയിൽ മൂടിക്കിടക്കുന്ന അവസ്ഥയിലാണ് താൻ കണ്ടതെന്ന് ആഗ്രയിലെ പൊതുപ്രവർത്തകൻ ഗോവിന്ദ് പരാശർ പറഞ്ഞു. വേദനകൊണ്ട് പുളഞ്ഞ നായ് അൽപസമയം കഴിഞ്ഞപ്പോൾ ചത്തതായും അദ്ദേഹം കൂട്ടിച്ചേർത്തു. മണ്ണുമാന്തി യന്ത്രമുപയോഗിച്ച് റോഡ് കുഴിച്ച് നായ്യെ പുറത്തെടുത്തശേഷം അദ്ദേഹം അതിെന സംസ്കരിക്കുകയായിരുന്നു. റോഡ് നിർമാണ കമ്പനിക്കെതിരെ താൻ പരാതി നൽകിയിട്ടുണ്ടെന്നും ഗോവിന്ദ് പരാശർ പറഞ്ഞു.