ഒാഫിസിൽ കയറി എൻജിനീയറെ മർദിച്ചയാൾ അറസ്​റ്റിൽ

തിരൂർ: വിവരാവകാശ അപേക്ഷയിൽ മറുപടി വൈകിയെന്നാരോപിച്ച് പൊതുമരാമത്ത് കെട്ടിട വിഭാഗം അസി. എൻജിനീയറെ ഓഫിസിൽ കയറി മർദിച്ചയാൾ പിടിയിൽ. കാടാമ്പുഴ കരേക്കാട് പരിയാര് വീട്ടിൽ രാമചന്ദ്രനെയാണ് (60) തിരൂർ എസ്.ഐ സുമേഷ് സുധാകർ അറസ്റ്റ് ചെയ്തത്. കോടതി 14 ദിവസത്തേക്ക് റിമാൻഡ് ചെയ്തു. ചൊവ്വാഴ്ച ഉച്ചക്ക് കെട്ടിട വിഭാഗം തിരൂർ ഓഫിസിലെ അസി. എൻജിനീയർ ചന്ദ്രാംഗദനെയാണ് രാമചന്ദ്രൻ മർദിച്ചത്. പരിക്കേറ്റ എൻജിനീയർ തിരൂർ ജില്ല ആശുപത്രിയിൽ ചികിത്സ തേടുകയും പൊലീസിൽ പരാതി നൽകുകയും ചെയ്തു.