മണ്ണാർക്കാട് ബ്ലോക്ക് പഞ്ചായത്ത്: ഒ.പി. ഷരീഫ് പ്രസിഡൻറ്​, റഫീഖ പാറോക്കോട്ടിൽ വൈസ്​ പ്രസിഡൻറ്​

മണ്ണാർക്കാട്: ബ്ലോക്ക് പഞ്ചായത്ത് പ്രസിഡൻറായി കോൺഗ്രസ് പ്രതിനിധി ഒ.പി. ഷരീഫിനെയും വൈസ് പ്രസിഡൻറായി മുസ്ലിം ലീഗ് പ്രതിനിധി റഫീഖ പാറോക്കോട്ടിലിനെയും തെരഞ്ഞെടുത്തു. 17 അംഗ ഭരണസമിതിയിൽ ഒമ്പത് വീതം വോട്ടുകൾ നേടിയാണ് ഇരുവരും തെരഞ്ഞെടുക്കപ്പെട്ടത്. യു.ഡി.എഫ് മുൻധാരണ പ്രകാരം രാജിവെച്ച സ്ഥാനത്തേക്കാണ് തെരഞ്ഞെടുപ്പ് നടന്നത്. ബ്ലോക്ക് പഞ്ചായത്ത് ഹാളിൽ ബുധനാഴ്ച രാവിലെ 11ഒാടെ പ്രസിഡൻറ് സ്ഥാനത്തേക്കും ഉച്ചക്ക് രണ്ടിന് വൈസ് പ്രസിഡൻറ് സ്ഥാനത്തേക്കുമാണ് തെരഞ്ഞെടുപ്പ് നടന്നത്. തുടർന്ന് ഇരുവരും സത്യപ്രതിജ്ഞ ചെയ്ത് അധികാരമേറ്റു. ജില്ല പട്ടികജാതി വികസന ഓഫിസർ സജീവൻ തെരഞ്ഞെടുപ്പ് നിയന്ത്രിച്ചു. പ്രസിഡൻറ് സ്ഥാനത്തേക്ക് ഇടതുപക്ഷത്തെ എം. അവറയും വൈസ് പ്രസിഡൻറ് സ്ഥാനത്തേക്ക് എ.കെ. ശാന്തകുമാരിയുമാണ് മത്സരിച്ചത്. 17 അംഗ ഭരണസമിതിയിൽ മുസ്ലിം ലീഗിന് അഞ്ചും കോൺഗ്രസിന് നാലുമടക്കം യു.ഡി.എഫിന് ഒമ്പതും സി.പി.എമ്മിന് ഏഴും സി.പി.ഐക്ക് ഒന്നുമടക്കം എൽ.ഡി.എഫിന് എട്ട് അംഗങ്ങളുമാണുള്ളത്. റഫീക്ക പാറോക്കോട്ടിൽ നേരത്തെ മണ്ണാർക്കാട് ബ്ലോക്ക് പഞ്ചായത്ത് പ്രസിഡൻറ്, അലനല്ലൂർ ഗ്രാമപഞ്ചായത്ത് പ്രസിഡൻറ് എന്നീ സ്ഥാനങ്ങൾ വഹിച്ചിട്ടുണ്ട്. നിലവിൽ വനിത ലീഗ് മണ്ഡലം പ്രസിഡൻറാണ്.