യുവതിക്കെതിരെ സൈബര്‍ ആക്രമണം: യുവാവിനെ അറസ്​റ്റ്​ ചെയ്​തു

പെരിന്തല്‍മണ്ണ: സിനിമയെക്കുറിച്ച് ഫേസ്ബുക്കില്‍ പോസ്റ്റിട്ടതി​െൻറ പേരിൽ യുവതിക്കെതിരെ സൈബര്‍ ആക്രമണം നടത്തിയ യുവാവിനെ പെരിന്തൽമണ്ണ പൊലീസ് ഇന്‍സ്‌പെക്ടര്‍ ടി.എസ്. ബിനു അറസ്റ്റ് ചെയ്തു. മണ്ണാർക്കാട് പുല്ലിശ്ശേരി കരിമ്പനക്കൽ നിയാസുദ്ദീനെയാണ് (22) െഎ.ടി. നിയമപ്രകാരം കേസെടുത്ത് അറസ്റ്റ് ചെയ്തത്. എഴുത്തുകാരി അങ്ങാടിപ്പുറത്ത ഡോ. പി. ഗീതയുടെ മകള്‍ അപര്‍ണ പ്രശാന്തിയുടെ ഫേസ്ബുക്ക് പേജിലാണ് അശ്ലീല കമൻറുകളും ഭീഷണിയും നിരത്തിയത്. ഇതിനെതിരേ നല്‍കിയ പരാതിയില്‍ പെരിന്തല്‍മണ്ണ പൊലീസ് കഴിഞ്ഞ 27ന് കേസെടുത്തിരുന്നു. അല്ലു അര്‍ജു​െൻറ സിനിമയെക്കുറിച്ച് അപര്‍ണ ഇട്ട പോസ്റ്റിനെതിരേയാണ് ലൈംഗിക ചുവയോടെയും മാനഹാനി വരുത്തുന്ന തരത്തിലും പോസ്റ്റുകള്‍ നിറഞ്ഞതെന്നായിരുന്നു പരാതി. അപര്‍ണ പൊലീസിലും സൈബർ സെല്ലിലും മുഖ്യമന്ത്രിക്കും പരാതി നല്‍കിയെങ്കിലും കമൻറുകള്‍ തുടർന്ന സാഹചര്യത്തിലാണ് പൊലീസ് കേസെടുത്തത്. കുടുംബത്തെ ചുട്ടുകൊല്ലുമെന്നതടക്കമുള്ള കമൻറുകളും രേഖപ്പെടുത്തിയിരുന്നു. സ്ത്രീത്വത്തെ അപമാനിക്കല്‍, അശ്ലീല പദപ്രയോഗത്തിലൂടെ അപമാനിക്കല്‍, ഭീഷണി തുടങ്ങിയവക്കുള്ള വകുപ്പുകള്‍ പ്രകാരമാണ് കേസ്.