പ്ലസ് വണിന് സ്കൂളിൽ അലോട്ട്മെൻറ് ആയിട്ടും അഡ്മിഷൻ നൽകിയില്ല; രക്ഷിതാക്കൾ പരിഭ്രാന്തിയിൽ

കൂട്ടായി: കൂട്ടായി മൗലാന ഹയർ സെക്കൻഡറി സ്കൂളിൽ പ്ലസ് വൺ പ്രവേശനത്തിനായുള്ള ഒന്നാം സപ്ലിമ​െൻററി അലോട്ട്മ​െൻറ് വന്നെങ്കിലും അഡ്മിഷൻ നൽകാതെ വിദ്യാർഥികളെ തിരിച്ചയച്ചത് രക്ഷിതാക്കളെ പരിഭ്രാന്തിയിലാഴ്ത്തി. സീറ്റ് ലഭിക്കാതെ സ്വകാര്യ സ്കൂളുകളിലോ സമാന്തര വിദ്യാഭ്യാസ സ്ഥാപനങ്ങളിലോ ചേരേണ്ടി വരുന്ന സാഹചര്യം നിലനിൽക്കെയാണ് പ്രതീക്ഷ നൽകി സപ്ലിമ​െൻററി അലോട്ട്മ​െൻറ് ഇറങ്ങിയത്. എന്നാൽ, വെള്ളിയാഴ്ചതന്നെ അഡ്മിഷന് വേണ്ടി സ്കൂളിലെത്തിയ വിദ്യാർഥികൾക്ക് നിരാശരായി മടങ്ങേണ്ടി വന്നു. ഒന്നാം സപ്ലിമ​െൻററി അലോട്ട്മ​െൻറ് പ്രകാരം പ്രവേശനം നേടാനുള്ള അവസാന തീയതി ചൊവ്വാഴ്ചയാണെന്നിരിക്കെ മാനേജ്മ​െൻറ് തമ്മിലുള്ള തർക്കം നിലനിൽക്കുന്നതിനാലും മെറിറ്റ് സീറ്റിലുൾപ്പെടുത്തി നിശ്ചയിക്കപ്പെട്ടിട്ടുള്ള മുഴുവൻ സീറ്റുകളും മാനേജ്മ​െൻറ് വിഭാഗത്തിലേക്ക് മറിക്കാനുള്ള നീക്കമായിരിക്കാം ഇതിനു പിന്നിലെന്ന അഭ്യൂഹവും പരന്നതോടെ രക്ഷിതാക്കളും വിദ്യാർഥികളും പരിഭ്രാന്തിയിലാണ്. മെറിറ്റ് സീറ്റിലെ പ്രവേശനത്തിനുശേഷം സപ്ലിമ​െൻററി അലോട്ട്മ​െൻറ് പ്രകാരം കുട്ടികളെ പ്രവേശിപ്പിക്കരുതെന്ന ഹൈകോടതി ഉത്തരവ് ഉള്ളതിനാലാണ് സപ്ലിമ​െൻററി അലോട്ട്മ​െൻറിൽ പ്രവേശനം ലഭിച്ച കുട്ടികൾക്ക് അഡ്മിഷൻ നൽകാതിരുന്നതെന്ന് പ്രിൻസിപ്പൽ അനിത പറഞ്ഞു.