കെവിൻ സ്മരണകളിൽ വിതുമ്പി 41ാം നാൾ ചടങ്ങ്

കോട്ടയം: കെവിൻ മറഞ്ഞിട്ട് 41 നാളുകൾ പിന്നിട്ടു. പ്രിയപ്പെട്ടവ​െൻറ ഓർമകൾ വിറങ്ങലിച്ചു നിൽക്കുന്ന നട്ടാശേരിയിലെ വാടകവീട്ടിൽ ഇപ്പോഴും കണ്ണീർ തോർന്നിട്ടില്ല. പുനലൂർ തെന്മല സ്വദേശി നീനുവിനെ പ്രണയവിവാഹം കഴിച്ചതി​െൻറ പേരിൽ ദുരഭിമാനത്തി​െൻറ ഇരയായി മരിച്ച കെവിൻ പി. ജോസഫി​െൻറ 41ാം ചരമദിനാചരണ ചടങ്ങുകൾ ശനിയാഴ്ച നടന്നു. രാവിലെ വീടിനടുത്തുള്ള കുന്നുംഭാഗം മൗണ്ട് കാർമൽ പള്ളിയിൽ കുർബാനക്കുശേഷം കെവിനെ അടക്കം ചെയ്ത കോട്ടയം നല്ലയിടയൻ പള്ളി സെമിത്തേരിയിൽ പ്രത്യേക പ്രാർഥന നടത്തി. നീനുവും കെവി​െൻറ മാതാപിതാക്കളും സഹോദരിയും അരമണിക്കൂറോളം കുഴിമാടത്തിങ്കൽ തിരിതെളിച്ച് കണ്ണീർതൂവി പ്രാർഥനനിർഭരരായി നിന്നു. അടുത്ത ബന്ധുക്കളെയും ചില സുഹൃത്തുക്കളെയും മാത്രമായിരുന്നു ക്ഷണിച്ചിരുന്നത്. മേയ് 26ന് കോട്ടയത്തെ വീട്ടിൽനിന്ന് തട്ടിക്കൊണ്ടുപോയ കെവിനെ 28ന് രാവിലെ തെന്മലയിലെ ചാലിയേക്കര തോട്ടിൽ മരിച്ചനിലയിൽ കണ്ടെത്തുകയായിരുന്നു.