സി.പി.എമ്മിന് സമരം ചെയ്യാനറിയാം; ഭരിക്കാനറിയില്ല ^ഉമ്മൻ ചാണ്ടി

സി.പി.എമ്മിന് സമരം ചെയ്യാനറിയാം; ഭരിക്കാനറിയില്ല -ഉമ്മൻ ചാണ്ടി പാലക്കാട്: സി.പി.എമ്മിന് സമരം ചെയ്യാനറിയാമെങ്കിലും ഭരിക്കാൻ അറിയില്ലെന്ന് മുൻ മുഖ്യമന്ത്രിയും എം.എൽ.എയുമായ ഉമ്മൻ ചാണ്ടി. കേരള സ്റ്റേറ്റ് സർവിസ് പെൻഷനേഴ്സ് അസോ. (കെ.എസ്.എസ്.പി.എ) സംസ്ഥാന സമ്മേളനഭാഗമായി സംഘടിപ്പിച്ച വിളംബര സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. അതിഗുരുതരമായ സാമ്പത്തിക പ്രതിസന്ധിയാണ് സംസ്ഥാനം നേരിടുന്നതെന്നും സമരവും ഭരണവും രണ്ടാണെന്നും ഉമ്മൻ ചാണ്ടി പറഞ്ഞു. യു.ഡി.എഫ് നടപ്പാക്കിയ പങ്കാളിത്ത പെൻഷൻ പദ്ധതി ഇല്ലാതാക്കാൻ ഇടത് സർക്കാറിനാവില്ലെന്നും ഉമ്മൻ ചാണ്ടി പറഞ്ഞു. കെ.എസ്.എസ്.പി.എ സംസ്ഥാന പ്രസിഡൻറ് അയത്തിൽ തങ്കപ്പൻ അധ്യക്ഷത വഹിച്ചു. കെ.പി.സി.സി ജനറൽ സെക്രട്ടറിമാരായ തമ്പാനൂർ രവി, സി.ആർ. ജയപ്രകാശ്, മുൻ എം.പി വി.എസ്. വിജയരാഘവൻ, ഡി.സി.സി പ്രസിഡൻറ് വി.കെ. ശ്രീകണ്ഠൻ, മുൻ എം.എൽ.എമാരായ കെ.എ. ചന്ദ്രൻ, സി.പി. മുഹമ്മദ്, കെ.പി.സി.സി സെക്രട്ടറി സി. ചന്ദ്രൻ, എ. രാമസ്വാമി, ഡി. അരവിന്ദാക്ഷൻ, വി. രാമചന്ദ്രൻ, കെ. ബാലകൃഷ്ണൻ തുടങ്ങിയവർ പങ്കെടുത്തു. 'മതാധിഷ്ഠിത ഫാഷിസത്തിനെതിരെ സാംസ്കാരിക കൂട്ടായ്മ' സെമിനാർ മുൻ മഹാരാഷ്ട്ര ഗവർണർ കെ. ശങ്കരനാരായണൻ ഉദ്ഘാടനം ചെയ്തു. ബി.സി. ഉണ്ണിത്താൻ അധ്യക്ഷത വഹിച്ചു. ഡോ. ആർസു, ബാലചന്ദ്രൻ വടക്കേടത്ത്, ആര്യാടൻ ഷൗക്കത്ത് എന്നിവർ സംസാരിച്ചു.