വല്ലപ്പുഴ-വാണിയംകുളം റോഡിൽ യാത്ര ദുരിതം

ഷൊർണൂർ: വല്ലപ്പുഴ-വാണിയംകുളം റോഡിലൂടെ യാത്ര ദുരിതപൂർണമായി. റോഡ് തകർന്നതും സംരക്ഷണ ഭിത്തികളില്ലാത്തതുമാണ് പ്രശ്നം ഗുരുതരമാക്കിയത്. ഈ റോഡിൽ വേമ്പലത്ത് പാടം കോട്ടക്ക് സമീപത്തെ റോഡിന് സമാന്തരമായ കുളം തകർച്ച ഭീഷണിയിലാണ്. നല്ല താഴ്ചയിലുള്ള കുളത്തിന് മുകളിൽ പുൽക്കാട് പിടിച്ച നിലയിലാണ്. നാട്ടുകാർ കെട്ടിയ നാട മാത്രമാണുള്ളത്. ഈ റോഡിൽ നിരവധി ഭാഗത്ത് ഇരുവശവും താഴ്ന്ന നിലയിലാണ്. ചിലയിടത്ത് മാത്രമാണ് സംരക്ഷണഭിത്തിയുള്ളത്. വർഷങ്ങൾക്ക് മുമ്പ് ബസ് മറിഞ്ഞ് നിരവധി പേർക്ക് പരിക്കേറ്റിരുന്നു. പ്രതിദിനം അനേകം ബസുകളടക്കമുള്ള വാഹനങ്ങളാണ് ഇതിലൂടെ പോകുന്നത്. ഇരുചക്ര വാഹനക്കാരും കാൽനടക്കാരും കുഴികളിൽ വീഴുന്നത് പതിവാണ്. പടം ഒന്ന്: വല്ലപ്പുഴ-വാണിയംകുളം റോഡിൽ വേമ്പലത്ത്പാടത്തെ കുളം തിരിച്ചറിയാൻ നാട കെട്ടിയ നിലയിൽ